Astanada úsh kósheniń qıylysynda jóndeý jumystary júrgiziledi

ASTANA. KAZINFORM — Elordada Q.Munaıtpasov kóshesi, M.Jumabaev dańǵyly jáne Abylaı han dańǵylynyń qıylysy jóndeýden ótedi, dep habarlaıdy Astana qalasynyń Kólik jáne jol-kólik ınfraqurylymyn damytý basqarmasy.

— Q.Munaıtpasov kóshesi, M.Jumabaev dańǵyly jáne Abylaı han dańǵylynyń qıylysynda jóndeý jumystary júrgiziletini týraly habarlaımyz. Osyǵan baılanysty atalǵan ýchaske 20 tamyz saǵat 23:00–den 21 tamyz saǵat 06:00–ge deıin, sondaı-aq 21 tamyz saǵat 23:00–den 22 tamyz saǵat 06:00–ge deıin ishinara jabylady. Kúndizgi ýaqytta qozǵalys ashyq bolady. Júrgizýshiler men jaıaý júrginshilerden marshrýttardy aldyn ala josparlaýdy jáne qozǵalysty uıymdastyrýdaǵy yqtımal ózgeristerdi eskerýdi suraımyz, — delingen habarlamada.

Qaýipsizdikti qamtamasyz etý jáne qolaısyzdyqty azaıtý úshin ýaqytsha jol belgileri men kórsetkishter ornatylatyn bolady.

Budan buryn elordada jol jóndep jatqan jumysshylardy avtokólik qaǵyp ketkeni anyqtaldy. Oqıǵa saldarynan bir jumysshy oqıǵa ornynda kóz jumdy.