Astanada úsh gaz taratý stantsııasy salynyp jatyr
ASTANA. QazAqparat – Astanada úsh gaz taratý stantsııasy salynyp jatyr. Qalalyq otyn-energetıka kesheni jáne kommýnaldyq sharýashylyq basqarmasy qurylys merzimi týraly baıandady, dep habarlaıdy QazAqparat tilshisi.
Basqarmanyń habarlaýynsha, bıyl salynyp jatqan nysandardy esepke almaǵanda jylý tapshylyǵy 300 gıgakalorııadan asty. Qazirgi ýaqytta elordada «Turan», «Telman» jáne «Ońtústik-Shyǵys» gaz taratý stantsııalary salynyp jatyr.
«Árbir gaz taratý stantsııasynyń óz qamtý aımaǵy bar. «Turan» stantsııasynyń jobalyq qýaty saǵatyna 600 gıgakalorııa, ol «Syǵanaq» kóshesiniń ońtústigi men «Turan» dańǵylynyń batys aýdandaryn qamtıdy. «Telman» jylý stantsııasynyń qýaty da 600 gıgakalorııa bolady, ol «Telman» turǵyn alabynyń ońtústigine qaraı salynatyn perspektıvaly aýdandar men «Táýelsizdik» kóshesine gaz taratpaq. Qýaty 350 gıgakalorııa bolatyn «Ońtústik-Shyǵys» jylý stantsııasyna «Myńjyldyq» alleıasy, «Nurly jol» vokzaly, «Qazaqstan» jańa turǵyn alaby qurylysynyń perspektıvaly aýdandary qarasty bolady. Úsh gaz jylý stantsııasynyń jalpy qýaty – 1550 gıgakalorııa», - dedi Marsel Uzaqbaev Astana qalasy máslıhatynyń sessııasynda.
Onyń aıtýynsha, 2023 jyly «Turan» jáne «Ońtústik-Shyǵys» gaz stantsııalarynyń 370 gıgakalorııasyn paıdalanýǵa berý josparlanýda. Qalǵan jobalyq qýattardy ýaqytyly qarjylandyrý shartymen 2024-2025 jyldary engizý josparlanǵan.
