Astanada úsh er adam qyzdardyń akkaýntymen jigitterdi kezdesýge shaqyryp, aqsha bopsalaǵan
ASTANA. KAZINFORM – Elordada turatyn úsh er adam Telegram messendjerinde qyzdardyń jalǵan akkaýnttaryn paıdalanyp, er adamdardy kezdesýge aldap shaqyrǵan. Odan keıin olardy qaladan tys jerge kúshtep alyp ketip, uryp-soǵyp, masqaralaıtyn beınejazbalardy taratamyz dep qorqytqan.
Qaskóıler bopsalaý arqyly úsh jábirlenýshiden jalpy somasy 2,2 mln teńgeni ıemdengen.
Birin mıkroqarjylyq nesıe rásimdeýge májbúrlegen, al ekinshisiniń avtokóligin ıemdenip alǵan.
Sotta memlekettik aıyptaýshy sottalýshylardyń kinásin tolyq dáleldedi.
Sot úkimimen úsh sottalýshy adam urlaý jáne bopsalaý qylmystary úshin 7 jyldan 8 jylǵa deıingi merzimge bas bostandyǵynan aıyryldy.
Jábirlenýshilerdiń keltirilgen zalaldy óteý týraly azamattyq talap-aryzdary qanaǵattandyryldy.
Sot úkimi zańdy kúshine endi.
Elorda prokýratýrasy azamattardy áleýmettik jeliler men messendjerler arqyly tanysý kezinde saqtyq tanytýǵa shaqyrdy. Sondaı-aq adam urlaý jáne aýyrlatatyn mán-jaılarda jasalǵan bopsalaý qylmystary úshin múlikti tárkileýmen birge 12 jylǵa deıin bas bostandyǵynan aıyrý túrindegi qylmystyq jaýaptylyq kózdelgenin eskertti.
Aıta keteıik, Aqtóbede munaı qaldyqtaryn óńdep, 393 mln teńge tapqan kásiporyn basshysy sottaldy.
