Astanada úsh bazardyń jumysy toqtatylýy múmkin
ASTANA. KAZINFORM – Elordadaǵy «Alash», «Sharyn» jáne «Saryarqa» bazarlarynyń ıeleri jańǵyrtý jónindegi nusqamalardy qaıta oryndamasa, atalǵan bazarlardyń jumysy sot sheshimimen toqtatyla turýy múmkin. Bul týraly Astana qalasy boıynsha Saýda jáne tutynýshylardyń quqyqtaryn qorǵaý departamentiniń basshysy Erkebulan Taǵashov málimdedi.
Departament basshysynyń aıtýynsha, elordadaǵy jeti bazar jańǵyrtý jónindegi jol kartasyna engizilgen. Atalǵan úsh bazardyń ıesine nusqamalardy oryndamaǵany úshin aıyppul salynǵan.
– Aıyppul salynǵanymen, bazar ıeleri jańǵyrtý jumystaryn aıaqtaýǵa mindetti. Buǵan deıin anyqtalǵan zańbuzýshylyqtardy joıý, bazarlardy statsıonarlyq saýda formatyna kóshirý jóninde nusqama bergen edik. Kásipkerlerge qaıta habarlama jiberdik, – dedi Erkebulan Taǵashov Astana qalasynyń Kommýnıkatsııalar qyzmetinde ótken baspasóz konferentsııasynda.
Onyń sózinshe, zań talaptary taǵy buzylsa, bazar ıelerine qaıta aıyppul salynady.
– Nusqama qaıta oryndalmaǵan jaǵdaıda bazarlardyń jumysyn toqtata turý týraly sotqa ótinishhat beremiz, – dedi departament basshysy.
Qazir «Ortalyq bazarda» ashyq alańdar men konteınerlerdegi saýdany toqtatý maqsatynda tekserý júrgizilip jatyr. Al «Uljan» bazarynyń ıesi jobalyq-smetalyq qujattamany usynyp, bazardy tolyq jańartyp, jańa nysan salýǵa daıyn ekenin bildirgen.
«Altaı» jáne «Shanhaı» bazarlarynda jańǵyrtý jumystary tolyq aıaqtalǵan. Qazir munda saýda statsıonarlyq nysandarda júrgiziledi.
Erkebulan Taǵashovtyń aıtýynsha, bazarlardy statsıonarlyq saýda formatyna kóshirýdiń zańda belgilengen merzimi bıyl 1 qańtarda aıaqtalǵan.
Eske salaıyq, bıyl shilde aıynda Astanadaǵy «Uljan», «Altaı», «Saryarqa», «Alash» jáne «Sharyn» bazarlaryn tekserý kezinde zań talaptarynyń saqtalmaǵany anyqtalǵan edi.