Astanada úsh balaǵa búırek aýystyrý operatsııasy jasaldy - QR Densaýlyq saqtaý mınıstrligi
ASTANA. 23 qarasha. QazAqparat - Astanada alǵash ret Densaýlyq saqtaý mınıstrliginiń shetelde emdelýge arnalǵan kútý paraǵynda turǵan balalarǵa búırek salý operatsııasy jasaldy.
Ulttyq medıtsınalyq holdıngtyń Ana men bala ulttyq ǵylymı ortalyǵyndaǵy (budan ári - ABUǴO) 4, 10 jáne 17 jastaǵy 3 balaǵa tiri týys donorlardan alynyp operatsııa jasaldy. Qazirgi ýaqytta operatsııa jasalǵan patsıentter reanımatsııa bóliminde, olardyń hal-jaǵdaıy turaqty jáne jasalǵan operatsııalardyń aýyrtpalyqtaryna sáıkes keledi. Alyp salynǵan músheler jumys istep tur. Bul týraly QR Densaýlyq saqtaý mınıstrliginiń baspasóz qyzmeti habarlady.
Donorlyq búırekterdi transplantatsııalaý boıynsha operatsııalar ımport almastyrýshy ınnovatsııalyq tehnologııalardy endirýge oraı sheberlik synybynyń sheńberinde Belarýs Respýblıkasynan kelgen áriptestermen birlesip jasaldy. Operatsııa eki operatsııa bóliminde jasaldy. Ýrologtar brıgadasynyń biri donorlyq búırekti alsa, dál sol ýaqytta basqa transplantologtar brıgadasy bala-retsepıentke búırek salý operatsııasyn jasady. Donorlar Respýblıkalyq dıagnostıkalyq ortalyqta tegin tekserildi, sol jerde operatsııadan keıingi kezeńde retsıpıentterdi taldaý monıtorıngi jasalady.
Búgingi tańda, Qazaqstanda balalar arasynda búırek aýrýlary problemasy óte ózekti. Shetelde búırek salý boıynsha kútý paraǵynda 27 bala tur, onyń 24-i ABUǴO-da orynbasarlyq búırek terapııasyn alyp júr. Ana men bala ortalyǵy balalarǵa jasalatyn orynbasarlyq búırek terapııasynyń barlyq 3-ýi - gemodıalız, perıtonealdy dıalız jáne búırek transplantatsııasy endirilgen respýblıkamyzdaǵy birinshi klınıka bolyp tabylady. Keıin búırek salynǵan balalar ósip, mektepke baryp, turmysqa shyǵady nemese úılenedi, bala súıedi.
Balalarǵa búırek salý boıynsha operatsııalar aldyn ala úlken daıyndyq kezeńinen ótedi. ABUǴO dárigerleri shetelde arnaıy daıyndyqtan ótti. Balalarǵa búırek salýdyń birqatar ózgesheligi bar ekendigin aıta ketken jón. Atap aıtqanda, ózine tán talaptarǵa sáıkes «eresekter» klınıkasynyń bazasynda kishkentaı patsıentterge búırek transplantatsııasyn jasaý múmkin emes. Operatsııaǵa deıingi kezeńdegi balalar dıalızi bólimshesiniń, operatsııanyń ózindik erekshelikteriniń bolýy jáne de eń mańyzdysy osyndaı patsıentterdi operatsııadan keıingi kezeńde baǵyp-kútý balalar nefrologiniń arnaıy daıyndyǵyn talap etedi. Qazirgi tańda Ana men bala ortalyǵynyń balalarǵa búırek transplantatsııalaý operatsııasyn jasaýǵa arnalǵan barlyq qajetti jaǵdaı jasalǵan - nefromorfologııalyq zerthana, dıalız, nefrologııa, shuǵyl terapııa jáne osyndaı operatsııalardan keıingi balalardy kútýge arnalǵan reanımatsııa bólimsheleri bar.
