Astanada úsh aıda 7000 sábı dúnıege keldi
ASTANA. 12 maýsym. QazAqparat - 2013 jyldyń 1 mamyryndaǵy málimet boıynsha Astana qalasy turǵyndarynyń sany 788 266 adamǵa jetti. Onyń ishinde Almaty aýdanynda - 364 396 (46,2%) Esil aýdanynda - 106 076 (13,5%), Saryarqa aýdanynda - 317 794 (40,3%) adam boldy. Bul týraly astana.kz saıtyna qalalyq statıstıka departamentinen málim etken.
«2013 jyldyń alǵashqy aıymen salystyrǵanda Astana qalasynyń halqynyń sany 10 068 adamǵa, sonyń ishinde Almaty aýdany - 714 adamǵa, Esil aýdany - 3 339 adamǵa, Saryarqa aýdany - 6 015 adamǵa ósti», - dep habarlaıdy departamentten.
Sondaı-aq, vedomstvo 2013 jyldyń birinshi toqsanynda - qańtar - sáýir aılary halyqtyń tabıǵı ósimi - 5 728 adam, kóshi-qon esebinen - 4 340 adam bolǵanyn atap kórsetedi.
Ótken jyldyń osy kezeńindegi birinshi toqsanmen salystyrǵanda týý men ólim-jitimniń óskendigi de baıqalady. Sonymen qatar, halyqtyń tabıǵı ósimi ótken jyldyń qańtar-sáýir aılarymen salystyrǵanda 19,8%-ǵa artyp, 5 728 adamǵa jetken.
«2013 jyldyń qańtar-sáýir aılarynda Astana qalasy boıynsha 6 919 sábı tirkelgen. Bul ótken jyldyń sáıkes kezeńimen salystyrǵanda 15,9%-ǵa artyq. Sondaı-aq, osy aralyqta 1 191 adam ólimi tirkelgen. Bul 2012 jyldyń qańtar-sáýir aılaryndaǵy kórsetkishpen salystyrǵanda 0,2%-ǵa artyq», - dep atap ótti vedomstvadan.
Qańtar-sáýir aılarynda 1 jasqa deıin shetinegen sábıler sany - 58. Bul 2012 jyldyń osy kezeńindegi kórsetkishpen salystyrǵanda 12-ge kem. 1 jasqa deıingi sábılerdiń shetineý koeffıtsınti 1000 jańa týǵan sábıge shaqqanda (2012 jyldyń qańtar-sáýir aılarynda - 11,72) 8,38 boldy.
Turǵyndar arasyndaǵy ólimniń negizgi sebepteri burynǵysynsha, qan aınalymy júıesiniń buzylýy - 39,3%, jańadan paıda bolǵan aýrýlar - 18,3%, baqytsyz oqıǵa, ýlaný men jaraqattan kóz jumý - 14,5% bolýda.
2013 jyldyń qańtar-sáýir aılarynda AHAT organdaryna tirkelgen neke qııýshylar sany ótken jyldyń osy kezeńimen salystyrǵanda - 8,2%-ǵa, ajyrasqandar sany - 13,4%-ǵa ósken.
