Astanada urlyqpen jáne tonaýmen aınalysyp kelgen ózge oblystardyń týmalary quryqtaldy
ASTANA. 12 qyrkúıek. QazAqparat - Astanada bir kúnde urlyqpen jáne tonaýmen aınalysyp kelgen ózge oblystardyń birqatar týmasy quryqtaldy. Bul týraly elordalyq Іshki ister departamenti «Saryarqa» aýdandyq ishki ister basqarmasynan habarlady.
Málim bolǵandaı, «Saryarqa» aýdandyq ishki ister basqarmasyna elordanyń eki turǵyny ózderin ashyq túrde tonap, aqshalaryn tartyp alyp ketkendigi týraly aryzdanǵan.
«Eki qylmysty ashýǵa «Bars» jedel-izdestirý tobynyń qyzmetkerleri dereý jumyldyrylyp, olar Saryarqa dańǵylynyń boıynda ornalasqan 15 úıdiń aýlasynda jasalǵan eki birdeı tonaý qylmysyn áshkereledi. Quqyq saqshylarynyń qoldaryna 18 ben 20 jas aralyǵyndaǵy úsh bozbala tústi. Olardyń bireýi Batys Qazaqstan, ekeýi Soltústik Qazaqstan oblystarynyń týmalary. Arasyndaǵy eń jasy urlyq jasaǵany úshin buryn isti bolǵan», - delingen taratylǵan habarlamada.
Aıǵaq zattar alynyp, QR Qylmystyq kodeksiniń 178 baby boıynsha qylmystyq is qozǵaldy. Kúdiktiler ýaqytsha ustaý abaqtysyna qamaýǵa alyndy.
Osy kúni «Bars» toby kásibı sheberlikterin taǵy bir iste kórsete aldy. Elordalyq dúken ıesinen uıaly telefon men 15 myń teńge aqshany urlap ketken 23 jastaǵy azamat toptyń shapshań qımylynyń arqasynda lezde qolǵa tústi. Anyqtalǵandaı, qaskóı buryn sotty bolǵan Ońtústik Qazaqstan oblysynyń týmasy. Ol ýaqytsha ustaý abaqtysyna jetkizilip, ústinen qylmystyq is qozǵaldy.
