Astanada úndi aqyny jáne sýretshi R.Tagordyń 150 jyldyq mereıtoıyna arnalǵan kórme ótedi
ASTANA. 6 maýsym. QazAqparat - 2011 jyldyń 10 maýsymynda QR Tuńǵysh Prezıdentiniń murajaıynda úndi aqyny jáne aǵartýshysy, sýretshi Rabındranat Tagordyń 150 jyldyq mereıtoıyna arnalǵan «Qyzyl shuǵyla» atty kórme ashylady.
Kórme murajaıdyń «Mádenıet arqyly suhbat» halyqaralyq jobasy sheńberinde ótkiziledi. Osy ýaqytqa deıin Astana turǵyndary men qonaqtary úndi halqynyń asa baı tarıhymen jáne mádenıet murasymen ǵana emes sondaı-aq, Úndistannyń qazirgi beıneleý ónerindegi birtýma jumystarymen tanysa aldy. «Qyzyl shuǵyla» atty kórme Úndi mádenıet ortalyǵy men Qazaqstan Respýblıkasyndaǵy Úndi elshiligi birlesip uıymdastyryp otyrǵan kezekti tórtinshi mádenı is-shara.
Rabındranat Tagor 1861 jyly 6 mamyrda Kalkýttada dinı-reformatorlyq qoǵamy kóseminiń otbasynda dúnıege kelgen. Asa zııaly otbasynda ósken Tagor sanskrıt, bengaldyq jáne aǵylshyn ádebıetterin oqyp, jazýshy retinde qalyptasty. Osylaısha ol klassıkalyq jáne halyqtyq Úndistandy eýropalyq mádenıetpen úndestire bildi.
Jazýshynyń murasy - romandar jáne povestter, 50-den astam dastandar men óleńder jınaǵy, 100-ge jýyq áńgimeler, kósemsóz, romantıka sıpatyndaǵy pesalar, fılosofııa salasyndaǵy jumystary, ádebıet jáne til tarıhy, mektep oqýlyqtary, Dante jáne Petrarkanyń óleńderiniń aýdarmalary. «Halyq rýhy» atty óleńi Úndistannyń, «Meniń altyn Bengalııam» atty óleńi Bangladeshtiń ulttyq ánurandary bolyp qalyptasty. Álemge tanymal bolǵan ol, 1913 jyly ádebıet salasynan Azııa jazýshylarynan alǵashqy bolyp Nobel syılyǵyn aldy. Onyń eńbekteri halyqaralyq tilderge aýdarylǵan.
Úndi halqynyń uly perzentiniń san qyrly shyǵarmashylyǵymen tanysýǵa múmkindik beretin kórmede R. Tagordyń 45 sandyq kóshirme sýretteri ornalasqan. Ekspozııatsııada sonymen qatar, QR Tuńǵysh Prezıdenti murajaıy qorynan alynǵan kádesyılar men kitaptar bolady.
