Astanada Uly Jeńistiń 70 jyldyǵyna arnalǵan erekshe otshashý uıymdastyryldy (FOTO)
Atalǵan merekelik shara Astana ýaqytymen saǵat 22:00-de bastaldy. Búgingi otshashýdyń basty ereksheligi, onyń bıiktigi 400 metrge deıin jetedi, dep habarlady QR Qorǵanys mınıstrliginiń baspasóz qyzmetinen. Otshashýlar 76 mıllımetrlik ZIS-3 zeńbirekterinen artıllerııalyq atýmen júzege asyrylady. Atalmysh zeńbirek te T-34 tanki men aty ańyzǵa aınalǵan «Katıýsha» tárizdi Uly Jeńis sımvoly bolyp tabylady. Otshashý zamanaýı LÝR-10 qondyrǵysynan túrli-tústi merekelik feıerverk túrinde berilýde. Artıllerııalyq jaraqtan barlyǵy 23 dúrkin atylady (1 dúrkinde 6 atý bar). Mundaı otshashý Almatydaǵy «Saıran» avtobeketi mańynda da oryn alýda. Sonymen qatar Qazaqstannyń barlyq iri qalalarynda da otshashýlar uıymdastyrylýda. Máselen, Qaraǵandyda ortalyq saıabaqta qalalyqtar 70 dúrkindi otshashýdy tamashalaı alady. Eske sala keteıik, 9 mamyr kúni Máskeýdegi Qyzyl alańda Uly Otan soǵysyndaǵy Jeńistiń 70 jyldyǵy qurmetine áskerı parad boldy. Oǵan 16 myńǵa jýyq adam men 200 áskerı tehnıka qatysty. Jeńis sherýine TMD elderinen - Ázerbaıjan, Armenııa, Belarýs, Qazaqstan, Qyrǵyzstan, Tájikstan, Úndistan, Mońǵolııa, Serbııa, Qytaıdan - 10 paradtyq esep atsalysty. Merekelik jıyndy Máskeýge Jeńis kúnine oraı kelgen álemniń 30-ǵa jýyq eliniń kóshbasshylary tamashalady.
