Astanada Uly Otan soǵysynyń batyrlaryna arnalǵan «Úsh juldyz» kórmesi ótýde
ASTANA. 25 maýsym. QazAqparat - Astana kúni qurmetine, sondaı-aq, 1941 jylǵy Uly Otan soǵysynyń bastalǵan kúnine oraı «ALJIR» saıası qýǵyn-súrgin jáne totalıtarızm qurbandary murajaı-memoraldyq kesheninde 20-ynan 27 maýsymǵa deıin qazaqtyń úsh batyr qyzy - Álııa Moldaǵulova, Mánshúk Mámetova jáne Hıýaz Dospanovaǵa arnalǵan «Úsh juldyz» memoraldyq kórmesi ótýde. Bul týraly Astana qalasynyń resmı saıtynan habarlandy.
Qazirgi qoı ústine boz torǵaı jumyrtqalaǵan, beıbit zamanda ómir súrip jatyp, biz osy bolashaq urpaqtyń mamyrajaı tynyshtyǵy úshin qanshama aǵa-apalarymyzdyń qany tógilgenin túsine bermeımiz.
Álııa Moldaǵulova Baltyq jaǵalaý maıdanynyń 22-armııasynyń 54-atqyshtar brıgadasynda mergen boldy. Efreıtor shenindegi jas qyzǵa Keńes Odaǵynyń Batyry ataǵy 1944 jyly (marqum bolǵasyn) berildi. Ol resmı esep boıynsha 78 jaý soldatynyń kózin joıǵan. 1944 jyldyń 14 qańtarynda Novosokolnıkı qalasy úshin urysta aýyr jaralanyp, qaza tapty.
Manshúk (Mánsııa) Mámetova 1943 jyly 15 qazanda Nevel qalasy túbindegi keskilesken urys kezinde kóz jumdy. Kalının maıdany 3-soqqy berý armııasynyń 21-gvardııasynyń pýlemetshisi, gvardııa aǵa serjanty. Keńes Odaǵynyń Batyry ataǵyn alǵan tuńǵysh qazaq áıeli. Ol Nevel úshin bolǵan urysta jaýdyń 70 soldatynyń kózin joıǵan. Erlikpen qaza taýyp, Nevel qalasyna jerlendi.
Hıýaz Dospanova 588-bombylaýshy avıapolkiniń shtýrman-atqyshy bolǵan. Ońtústik maıdan, Soltústik Kavkaz, Zakavkaze, Ýkraına jáne Belarýs jerinde áskerı tapsyrmalardy oryndaýǵa qatysty. Hıýaz Dospanova maıdannan elge ІІ toptaǵy múgedek bolyp oraldy. 1951 jyly Qazaq KSR-i Joǵarǵy Keńesine depýtat bolyp, birinshi sessııada Prezıdıým hatshylyǵyna saılanǵan. Qyryq jasqa jetpeı 1959 jyly májbúrlikten zeınetkerlikke shyqty. Ol 2008 jyly 20 mamyrda qaıtys boldy.
Kórmede qazaqtyń osy batyr qyzdarynyń sýreteri men qujattary, soǵys kezinde jazylǵan hattary, sondaı-aq sol aýyr jyldarda olar paıdalanǵan jeke zattary qoıylǵan. Kórmege kelýshi árbir adam sum soǵys salǵan qasiret pen qatygezdiktiń, qıynshylyq pen jan kúızelisiniń taptaryn sarǵaıǵan jádigerlerden kórip, júrekterimen túısine alady. Soǵys talaı balaýsa jandardyń armandaryn úzdi...
Kórme 26 maýsymǵa deıin jalǵasady.
