Astanada Uly Otan soǵysynyń ardagerleri tolyqtaı baspanamen qamtamasyz etilgen

Bul týraly búgin elorda ákimi Imanǵalı Tasmaǵambetov Astanada ardagerler uıymynyń 25 jyldyq mereıtoıyna oraı joldaǵan quttyqtaý hatynda málim etti.

 Qala basshysynyń hatyn qalalyq ardagerler qaýymynyń aldynda onyń orynbasary Vasılıı Krylov oqyp berdi.

 «Astanada Uly Otan soǵysynyń ardagerleri tolyqtaı baspanamen qamtamasyz etilgen. 2009-2011 jyldar aralyǵynda soǵys ardagerlerine 199 páter berildi. Búgingi kúni birde-bir ardager páter alý kezeginde turǵan joq», - delingen ákimniń joldaýhatynda.

 I. Tasmaǵambetov atap ótkenindeı, qazirgi ýaqytta Astanada 50 myńǵa jýyq zeınetker turady. Sonyń ishinde Uly Otan soǵysynyń 370 ardageri, 4600 tyl eńbekkeri bar.

 «Ardagerlerge qurmet kórsetý memleket saıasatynyń jáne qalalyq bıliktiń basymdyqty mindetteriniń biri. 2011 jyly olarǵa áleýmettik kómek kórsetý úshin jergilikti bıýdjetten 180 mln. teńge bólindi», - deıdi ákim.

 Uly Otan soǵysynyń qatysýshylary men múgedekteri úshin sanatorııalyq jáne kýrorttyq em-dom alýlaryna jyl saıyn tegin joldamalar beriledi, sonymen qatar qoǵamdyq kólikterde tegin júrý bıletterimen jáne tegin dári-dármektermen qamtamasyz etiledi.