Astanada Uly Otan soǵysynyń ardagerleri tolyqtaı baspanamen qamtamasyz etildi (FOTO)

ASTANA. QazAqparat - Astanada Uly Otan soǵysynyń ardagerleri tolyqtaı baspanamen qamtamasyz etilgen. Bul týraly búgin elordada Uly Jeńistiń 70 jyldyǵyna arnalǵan dástúrli «Kóktemniń shýaqty kúnderi-2015» atty aktsııa barysynda qalalyq Ardagerler keńesi tóraǵasynyń orynbasary Esbolat Dúısenov málim etti.

Onyń aıtýynsha, Astana qalasynda Uly Otan soǵysynyń 210 ardageri turyp jatyr.

«Ókinishke oraı, olardyń sany jyl saıyn azaıyp keledi. Bes jyl buryn 500 ardager bolatyn», - deıdi ol.

E.Dúısenovtyń sózine qaraǵanda, qazirgi ýaqytta memleket tarapynan ardagerlerge kóptegen materıaldyq kómekter jasalýda.

«Memleket, sonyń ishinde Astana ákimdigi soǵys ardagerlerine qoldan kelgenniń barlyǵyn jasap jatyr. Ardagerlerdiń barlyǵy páterlermen qamtamasyz etilgen. Jaqynda ǵana páterge muqtaj sońǵy 7 ardager baspanaly boldy. Sonymen qatar materıaldyq kómek te ulǵaıdy. Qala máslıhaty 9 mamyr kúni ardagerlerge 1,1 mln. teńge berý jóninde sheshim qabyldady. Oǵan qosa, Úkimet bıýdjetten 100 myń teńge bóledi. Árıne bul aqshanyń olarǵa úlken kómegi tıedi. Olar úshin eshteńe aıaýǵa bolmaıdy. Ardagerler qaladaǵy barlyq uıymdardyń nazarynan tys qalǵan emes. Olarǵa osy qurmettiń kórsetilýi asa qajet ekendigin barlyǵy túsinedi», - dep atap ótti ol.