Astanada «Uly dala sazy» dástúrli óner oryndaýshylarynyń halyqaralyq festıvali bastaldy

dep habarlaıdy QazAqparat.

Festıvalǵa Qazaqstannan bólek Qyrǵyzstan, Reseı elderiniń ónerpazdary kelgen. Dástúrli mýzykanyń qyr-syryn jetik meńgergen ónerpazdar shertpe, yspaly, úrlemeli aspaptarda óner kórsetip, án- jyr, terme, naqyl- nasıhat, dastan-epostardy oryndaý sheberlikterin pash etedi.

«Uly dala sazy» festıvali aıasynda Syr boıynyń, Jetisýdyń, Batys Qazaqstannyń, Arqanyń án oryndaý mánerleri usynylady. Al Altaı qazaqtarynyń mýzyka sheberleri «jandy oryndaý» retimen ejelgi túrki mýzykasynyń keremet dástúri - kómekeımen án salý ónerin kórsetedi. Astana jurty hakas pen qyrǵyz qomýzy, qazaqtyń shańqobyz, qylqobyz, dombyra aspaptarynda oryndalatyn áýezdi kúılerine kýá bolady.

Sharanyń uıymdastyrýshysy, «Qazaqstan halqynyń rýhanı damý qory» AQ basshysy Almas Nurazhannyń aıtýynsha, halyqaralyq festıvaldiń maqsaty - túbi bir túrki halyqtarynyń mádenıetin biriktirý, olardyń án-jyryn, kúıi men sazyn, eposyn jan-jaqty nasıhattaý, sonymen qatar, dástúrli mýzykanyń barlyq janrlaryn, ásirese kenje qalǵan, sırek ushyrasatyn aspaptarda oryndalatyn janrlardy jańǵyrtý.

«Qazaqtyń óneri, bizge jaqyn halyqtardyń óneri qandaı dárejede ekendigin bilip, mádenı almasýǵa qol jetkizgen saıyn, ónerimiz ben mádenıetimiz qaryshtaı túspek. Eń birinshi maqsat sol»,-deıdi A. Nurazhan.

Shara Qazaqstan Prezıdentiniń bastamasymen qolǵa alynǵan «Mádenı mura» baǵdarlamasy aıasynda ótkizilip otyr. Festıval qyrkúıektiń 16-sy kúni keshqurym ótetin gala-kontsertpen aıaqtalady.