Astanada Uly Dala sazy áýeledi
ASTANA. 14 qyrkúıek. QazAqparat - Búginde Astana qalasy túrki áleminiń mádenı astanasy bolyp jarııalanǵany belgili. Osy shara aıasynda ótkizilip jatqan búgingi festıvaldiń tek qazaq mádenıeti emes, kúlli túrki mádenıetine tıgizer paıdasy mol.
Bul týraly búgin Astanada K. Baıseıitova atyndaǵy Ulttyq opera jáne balet teatrynda ótken «Uly Dala sazy» dástúrli oryndaýshylardyń halyqaralyq festıvaliniń ashylý saltanatynda QR Mádenıet jáne aqparat mınıstri Darhan Myńbaı málim etti.
«Keshe ǵana TÚRІKSOI-ǵa múshelerdiń ıÝNESKO isteri jónindegi ulttyq komıssııalary men komıtetteriniń úshinshi keńesi ótti. Onda da túrki halyqtarynyń mádenıeti jónindegi máseleler talqylandy. Munyń bárin aıtyp otyrǵan sebebim, shyn máninde Qazaqstannyń mádenıetine, túrk mádenıetine álemniń nazary aýyp, úlken qyzyǵýshylyq tanyta bastady. Elbasymyz Nursultan Nazarbaev qazaq ónerin, onyń ishinde dástúrli ónerdi damytýǵa kóp kóńil bólip kele jatyr. Sol bastamany biz odan ári damytýǵa mindettimiz. Túrki jurtyn biriktirip otyrǵan osyndaı óner saıystary kóbeıe bersin degen tilek aıtqym keledi», - dedi mınıstr.
Eki jylda bir ret ótkizilip kele jatqan dástúrli festıvaldi QR Mádenıet jáne aqparat mınıstrligi «Qazaqstan halqynyń rýhanı damý qory» AQ-nyń qoldaýymen uıymdastyryp otyr. Sharanyń maqsaty álemdik mýzyka ónerine aıtarlyqtaı úles qosqan qazaq jáne túrki halyqtarynyń dástúrli mýzykasyn, sonyń ishinde áni men kúıin jan-jaqty nasıhattaý, dástúrli mýzykaǵa júıeli túrde qamqorlyq jasaý isiniń jandana túsýine memleket tarapynan qoldaý kórsetý bolyp tabylady.
Kontsertte QR halyq ártisi Qaırat Baıbosynov, QR eńbek sińirgen ártisi Aıgúl Úlkenbaeva, QR mádenıet qaıratkeri Janǵalı Júzbaev jáne basqa da dástúrli oryndaýshylar óner kórsetti. Sahnada Qurmanǵazy, Dáýletkereı, Qazanǵap, Dına, Súgir, Táttimbet sııaqty tanymal dáýlesker kúıshileriniń kúıleri jáne qazaqtyń Arqa, Batys, Jetisý, Syr óńirleriniń dástúrli ánderi áýeledi. Sondaı-aq, altaı halyqtarynyń eposy «Qozıýke-Baıan», noǵaı halyq kúıi «Iorǵa saz» sııaqty týyndylary oryndaldy.
Kontsertke TÚRKSOI-dyń, Túrki tildes elderdiń ıÝNESKO isteri jónindegi Ulttyq komıssııasynyń, Halyqaralyq dástúrli mýzyka uıymynyń basshylyǵy jáne shetelderden kelgen mýzyka zertteýshileri qonaq retinde qatysty.
