Astanada Uly dala ónerine arnalǵan kórme ashyldy

 Leıla Mahattyń «Ulylyqqa taǵzym» atty kórmesinde 16 sýret pen 9 grafıkalyq jumys qoıylǵan. 

Kórmeniń taqyryby men tujyrymdamasy negizinde sýretshi óz shyǵarmasynda ártúrli keskindeme tehnıkalaryn qoldanǵan.. Grafıkalyq jumystyń serııasyndaǵy «Ejelgi qudaılarǵa tabyný» erekshe oryn alady. Sondaı-aq onyń jumysyndaǵy taǵy bir nazar aýdararlyq týyndy - «Aspan men jer» serııasy.

«Bılik kúsheıedi, quldyraıdy, ańyzdar umytylady, al aspan bizdiń mıllıondaǵan jyldar boıy bizdi baqylap turady. Jer adamzattyń panasy men qorek qorynyń mekeni. Men úshin ádemi aspan týǵan jerimniń aspany. Sonymen qatar meni qyzyqtyratyn taqyryp ejelgi órkenıet mádenıeti. Ejelgi beıneleý óneriniń eskertkishteri men úshin zertteý taqyryby ǵana emes, umytylǵan bilimdi de túsinýdiń tásili retinde árqashan qyzyqty», -deıdi  Leıla Mahat. 
 

Kórmeniń ekinshi bóliminde jas sýretshi Qanat Nurtazınniń «Sheksiz» atty shyǵarmashylyq jumystary bar. Onyń týyndylary «Soft-art» (Software Art) qarym-qatynas óneri, strıt-art (Street Art) Vı-Djeı (VJ Art), stakızm (Stuckism), toızm (Toyism),fanızm (Funism), mass- sıýrrealızm (Massurrealism) baǵyttaryna arnalǵan.

Qanattyń kórmesinde barlyǵy 100-ge jýyq sýret, 10 ınstalıatsııa jáne 40 portret qoıylǵan. 

«Shyǵarmashylyq jumystarymdy Instagram jelisinde bólisýden bastadym. Biraq kartınalarym kórme uıymdastyrýǵa ákeledi dep oılaǵan emespin. Bir sýretti salýǵa 1 saǵattan 1-2 kúnge deıin ýaqyt ketedi. Meniń jumystarymnyń suranysqa ıe bolýy qazirgi zamanǵa saı stılde jasalǵandyqtan dep oılaımyn. Bul sýretshi retinde alǵashqy kórmem, aldaǵy ýaqytta shyǵarmashylyǵymdy qoǵamdaǵy mańyzdy taqyryptarǵa arnap jalǵastyrsam deımin», - deıdi ol.
 

Aıta keteıik, kórme Astanada jýyrda ótetin Álemdik jáne dástúrli dinder kóshbasshylary sezin oraı «Qulanshy» qazirgi zamanǵy óner ortalyǵynyń uıymdastyrýymen ótti.