Astanada Ulttyq ulan jaýyngerleri joǵalǵan qyzdy tapty
ASTANA. QazAqparat - Ulttyq ulannyń áskerı jasaǵy Astanada joǵalyp ketken qyzdy anasyna taýyp berdi dep habarlaıdy, ulannyń baspasóz qyzmeti.
Qyzdy izdestirýge Ulttyq ulannyń jasaq bastyǵy kapıtan Vasılıı Gýnko, patrýlshiler - qatardaǵy Aleksandr Novıkov pen Raıymbek Eleýǵalıev kómektesken.
Oqıǵa keshki saǵat altylar shamasy bolatyn. Qyzmetke endi kirisken jasaq Nurly jol kóshesi boıymen tártip qadaǵalap kele jatty. Kenetten olardyń aldynan mazasy qashqan áıel adam shyǵa kelip, kishkentaı qyzynyń joǵalǵanyn aıtyp, kómek suraıdy. Anasynyń aıtýynsha, tórt jasar Damıradan kóz jazyp qalǵanyna eki saǵattaı ótipti.
Áskerıler bul týraly dereý kórshi baǵyttaǵy jasaqtarǵa habarlap, joǵalǵan qyzdy izdeýge kirisedi. Jasaq bastyǵy kapıtan Gýnko bastaǵan top kishkentaı qyzdyń sıpattamasy boıynsha shuǵyl qımyldap, nátıjesinde ony beıtanys azamattyń qasynan tabady. Áskerıler atalǵan azamatty toqtatyp, bul týraly shuǵyl patrýldik top bastyǵy maıor A. Muratovqa baıandap, jedel-tergeý tobyn shaqyrtady. Budan keıin ustalǵan azamat, anasy men qyzy oqıǵanyń mán-jaıyn anyqtaý maqsatynda Astana qalasy Esil aýdanynyń ishki ister basqarmasyna jetkizildi.
