Astanada Ulttyq ulan jaýyngeri sýǵa batqan kisini qutqardy
ASTANA. QazAqparat - Astanada ulandyq jaýynger sýǵa batqan kisini qutqaryp qaldy, dep habarlaıdy QazAqparat «Ulttyq ulannyń» baspasóz qyzmetine silteme jasap.
Oqıǵa 9 tamyz kúni saǵat 05:50 kezinde Haziret Sultan meshiti artyndaǵy Esil ózeni boıynda oryn alǵan. Ulttyq ulan Án-bı ansambliniń kontsertmeısteri, efreıtor Denıs ıAkovlev tańǵy jattyǵý kezinde ózen boıyn jaǵalap, júgirip kele jatady. Ony toqtatqan er kisi polıtsııa bólimshesine sý betinde bireýdiń denesi jatqanyn habarlaý úshin telefon tappaı turǵanyn aıtady. Denıs dereý óz kózimen kórý úshin sol tusqa júgirip barady. Jaqyndap, anyqtap qaraǵanda álgi azamattyń basyn qımyldatyp, belgi bergenin baıqaıdy.
Birli jarym-suraq qoıǵanda, jaýap qatpaıdy, ábden tońsa kerek, daýys shyǵarmaıdy. Sodan efreıtor ıAkovlev ne de bolsa, táýekelge bel býyp, sýǵa súńgip ketedi. Elýdi alqymdap qalǵan er kisi eken, yńǵaılap, áýpirimdep birde aıaǵynan tartyp, birde ıyǵyna salyp, jaǵaǵa alyp shyǵady.
Jedel járdem men polıtsııa qyzmetkerleri kelgenshe, aıaq-qolyn ýqalap, qurǵaq kıimmen orap, alǵashqy medıtsınalyq kómek kórsetedi. Keıinnen Denıs sý tereńdiginiń birshama ekenin aıtty. Oqıǵa ornyna jetken polıtsııa qyzmetkerleri japa shegýshiniń qujattary men jeke zattaryn tabystady. Qujatynan onyń 03.01.1969 jyly týǵan Qostanaı oblysynyń azamaty ekeni belgili boldy. Búginde azamat Astana qalalyq temirjol aýrýhanasynda em qabyldap jatyr. Densaýlyǵy birqalypty, ómirine eshqandaı qaýip tónip turǵan joq.
Baspasóz qyzmetiniń habarlaýynsha, Denıs ıAkovlevtiń Qazaqstan Respýblıkasy Ulttyq ulanynda qyzmet etip júrgenine 6 jyl bolǵan. Qazirgi laýazymy - Án-bı ansambliniń kontsertmeısteri, otbasyly, eki qyzy bar.
