Astanada ulttyq teatrlardyń respýblıkalyq festıvali ótedi

Qazaqstan Respýblıkasy Táýelsizdiginiń 20 jyldyǵyna arnalǵan bul sharany Qazaqstan Respýblıkasy Mádenıet mınıstrligi men «Qazaqstan halqynyń rýhanı damý qory» aktsıonerlik qoǵamy uıymdastyryp otyr. Festıval Qazaqstan halqy Assambleıasynyń qoldaýymen ótedi, dep habarlady Mádenıet mınıstrliginiń baspasóz qyzmeti.

«Festıvaldiń maqsaty - elimizdiń ár túrli mádenıeti men tilin saqtap qalý, mádenıetti ózara baıytý, etnosaralyq tózimdilikti nyǵaıtý men Qazaqstan halqynyń mádenıetaralyq kelisimin odan ári damytý bolyp tabylady», dep atap kórsetilgen vedomstvonyń habarlamasynda.

Festıvalǵa Qazaqstan Ulttar teatry, Q.Qýanyshbaev atyndaǵy Qazaq mýzykalyq drama teatry, M.Gorkıı atyndaǵy Memlekettik orys drama teatry, Q.Qojamııarov atyndaǵy Memlekettik respýblıkalyq uıǵyr mýzykalyq komedııa teatry, Memlekettik respýblıkalyq koreı mýzykalyq komedııa teatry, Respýblıkalyq nemis drama teatry jáne Ońtústik Qazaqstan oblystyq ózbek drama teatry qatysady.

Festıval qoıylymdary K.Baıseıitova atyndaǵy Ulttyq opera jáne balet teatrynyń, Q.Qýanyshbaev atyndaǵy Qazaq mýzykalyq drama teatrynyń jáne M.Gorkıı atyndaǵy memlekettik orys drama teatrynyń sahnalarynda kórsetiledi.

Jeńimpazdar: «Eń úzdik spektakl», «Eń úzdik rejısserlik sheshim», «Qazaq dramatýrgııasyn tabysty meńgergeni úshin», «Eń úzdik ulttyq avtorlardyń dramatýrgııasy úshin», «Eń úzdik áıel adam beınesi úshin», «Eń úzdik er adam beınesi úshin», «Eń úzdik ekinshi plandaǵy áıel adam beınesi úshin», «Eń úzdik ekinshi plandaǵy er adam beınesi úshin», «Eń úzdik debıýt», «Kórermender kózaıymy» sııaqty atalymdar boıynsha anyqtalatyn bolady.