Astanada ulttyq sport túrlerinen festıval ótti

AQTAÝ-ASTANA. QazAqparat - EKSPO-2017 halyqaralyq mamandandyrylǵan kórmesi aıasynda Astanadaǵy «Qazanat» ıppodromynda Mańǵystaý oblysynyń mádenıet kúnderine arnalǵan ulttyq sport túrlerinen festıval ótti, dep habarlaıdy ákimniń baspasóz qyzmeti.

Astana qalasynyń turǵyndary men qonaqtary mańǵaz Mańǵystaýdyń mádenı jáne sporttyq sharalaryn kórsetetin keń kólemdi baǵdarlamasyna kýá boldy.  

Baǵdarlama aıasynda kókpardan Qazaqstan Respýblıkasynyń jeńimpazy,  Jambyl oblysynyń «Áýlıe Ata»  jastar quramasy men 2017 jyldyń el birinshiliginiń kúmis júldegeri Mańǵystaý oblysynyń «Adaı Ata» jastar quramasy qarymta kezdesýi ótti. Muny at sportynyń mamandary men jankúıerler asyǵa kútken edi.

Sonymen qatar festıval aıasynda jigittik óner, qyz qýý, teńge alý, saıatshylyq, qumaı tazy, qazaq kúresi, toǵyzqumalaq, asyq atý syndy ulttyq sport túrlerinen jarystar men sheberlik kórsetilimder jáne kontserttik baǵdarlamalar jurtshylyqqa pash etildi.