Astanada ulttyq sport festıvali ótip jatyr
ASTANA. QazAqparat - Elorda irgesindegi «Qazanat» atshabarynda Ulttyq sport túrlerinen VI festıval bastaldy, dep habarlaıdy QazAqparat tilshisi.
Festıvaldiń ashylý saltanatyna Parlament Májilisiniń tóraǵasy Erlan Qoshanov qatysyp, sportshylarǵa sáttilik tiledi.
Tórt jylda bir ótetin ulttyq sport dodasynda óńirler asyq atý, aýdaryspaq, báıge, dástúrli sadaq atý, jamby atý, jekpe-jek, kókpar, qazaq kúresi, qusbegilik, teńge ilý, toǵyzqumalaq sport túrleri boıynsha jarysady.
Festıval qorytyndysy boıynsha ulttyq sportty joǵary deńgeıde damytyp otyrǵan óńirlerdiń úzdik úshtigi anyqtalady. Jarys jeńimpazdary ball boıynsha eseptelip, eń kóp upaı jınaǵan óńirler jeńis tuǵyryna kóteriledi.
Festıvalge elimizdiń barlyq óńirinen 11 sport túri boıynsha 1362 sportshy qatysýǵa ótinim bergen.
Uıymdastyrýshylardyń aıtýynsha, festıvaldiń baǵdarlamasyna bıyl «dástúrli sadaq atý» (jerde turyp sadaq atý) sporty tuńǵysh ret qosylyp otyr. Sonymen qatar, kókpardaǵy jekpe-jek attardyń jeke jarysy kórsetilim (pokazatelnyı) retinde enbek.
Jarys Týrızm jáne sport mınıstrligi, Astana qalasynyń ákimdigi, QR Ulttyq sport túrleri qaýymdastyǵy, Ulttyq sport túrleri federatsııalary, «Samruq-Qazyna» ulttyq ál-aýqat qory» AQ, «Týrızm jáne sportty qoldaý qorynyń» muryndyq bolýymen ótip jatyr.
Ulttyq sporttyń jankúıerleri festıvaldi 4-10 kúnderi myna mekenjaılarda tamashalaı alady: qazaq kúresi - J.Úshkempirov atyndaǵy jekpe-jek saraıy, asyq atý men toǵyzqumalaq - «Qazaqstan» JASK, jekpe-jek - «Aspan» sport kesheni. Al, kókpar, báıge, teńge ilý, jamby atý, aýdaryspaq, dástúrli sadaq atý, qusbegilik sporttary «Qazanat» ıppodromynda ótedi.
Jarys baǵdarlamasyndaǵy kókpar, qazaq kúresi tikeleı, qalǵan sport túrleri boıynsha arnaıy reportajdar Qazsport telearnasynan kórsetiledi.
