Astanada Ulttyq orman egý kúni ótedi
ASTANA. QazAqparat - 23 sáýirde elordada jalpyqalalyq senbilikten basqa QR Táýelsizdiginiń 25 jyldyǵyna jáne Jer kúnine oraı aǵashtar otyrǵyzylady. Arnaıy daıyndalǵan gúlzarlarǵa Sıvers almasy, emen, qyzyl sheten, aq qaıyń, sibir shyrshasy, aq tal, pıramıdaly terek, qyzyltal, sondaı-aq, balzam ıisti terek aǵashtarynyń 1000-nan astam kósheti otyrǵyzylady, dep habarlaıdy qalalyq ákimdiktiń baspasóz qyzmeti.
- Dala ósimdikteri kóp ósetin bizdiń dalalarda aǵash az. Sondyqtan jastardy búkil jerge aǵash otyrǵyzýǵa shaqyramyz. Aǵashty neǵurlym kóp otyrǵyzsaq, aýa soǵurlym taza bolady, - deıdi «Turaqty damý» Jer qorynyń bıology Valentına Obodovskaıa.
Qazaqstanda Ulttyq orman otyrǵyzý kúni alǵash ret 2014 jyly 19 sáýirde ótkizildi. Bıylǵy aktsııa «Barys-Arena» muz aıdyny janynda ótedi.
Aıta keteıik, qalany abattandyrý jáne aǵash otyrǵyzý jumystary Astananyń úsh aýdanynda júrgiziledi. Elorda ákimdiginiń habarlaýynsha, bul kúni Astanada 16 myńnan astam aǵash egiledi.
Orynbor kóshesinde jáne «Araı» parkinde, Aqyrtas, Ǵabdýllın, Ýálıhanov kóshelerinde, Tilendıev dańǵylynda jáne t.b. jerlerde jappaı aǵash otyrǵyzylady. Kógaldandyrý obektilerinde tıisti oryndar daıyndalyp, kóshetter qoıyldy, ınerttik materıal (qunarly jer, topyraq, qara topyraq) qajetti mólsherde ákelindi.
