Astanada ulttyq qundylyqtar bı óneri arqyly dáripteldi

ASTANA. QazAqparat – Búgin elordada «Naz» memlekettik bı teatry qala turǵyndary men qonaqtaryna «Respýblıkam - Qazaqstan!» atty merekelik kontsertin usyndy, dep habarlaıdy QazAqparat tilshisi.

Shara bas shahardaǵy «Naz» teatrynyń ǵımaratynda ótti. Kontsert Respýblıka kúni merekesine oraılastyrylǵan.

Atalǵan teatrdyń kórkemdik jetekshisi, baletmeıster Qadısha Aǵymbaevanyń aıtýynsha, bıyl merekege ulttyq mártebeniń berilýi eldikti aıǵaqtaı túsedi.

«Búgin biz Astana turǵyndary men «Naz» teatrynyń gastroldik saparlary, jańa shyǵarmalary jáne baǵytyn baqylap otyratyn kórermenimiz úshin osyndaı baǵdarlamany usyndyq. Kontsertti kórýge qalamyzdyń túkpir-túkpirinde turatyn adamdar kelip otyr. Kezinde ózimiz de osy merekede túrli sharalarda bıledik. Úlken alańda kontsertter ótetin edi. Biraq 2009 jyldan keıin bul mereke umytyldy. Degenmen araǵa jyldar salyp, ulttyq merekemiz qaıta jańǵyryp jatyr. Oǵan biz óte qýanamyz. Sebebi egemendigi, ánurany, kók týy bar el, respýblıka retinde bizdiń osyndaı merekemiz bolýy kerek. Bul eldigimizdi aıǵaqtaıdy dep bilemin», - deıdi Qadısha Aǵymbaeva.

Merekelik kontsert barysynda túrli qoıylym kórermen nazaryna usynyldy. Onyń basym bóligi ulttyq tárbıe, tarıh pen salt-dástúrge negizdelgen.

«Biz bıge mindetti túrde ózimizdiń salt-dástúr elementterin qosamyz. Kóbi bıdi túsine bermeıdi ǵoı. Sol túsinikti bolýy úshin, ómirden alynǵan dúnıe ekenin kórsetý maqsatynda tárbıelik mánge kóp kóńil bólemiz. Sondyqtan osy kontsert barysynda «Besikke salý», «Tusaý keser», «Betashar» jáne «Qyz qýý» sııaqty dástúrlerimiz kórsetildi. Árıne, osylardy biz bıdiń tilimen usynamyz. Osyndaı elementteri kórgende adamnyń oıyna aýyl, tarıh, ulttyq rýh oralatyny sózsiz. Bizdiń de maqsat osy», - deıdi Qadısha Aǵymbaeva.

Bı ujymynyń ónerin tamashalaýǵa 100-den asa kórermen keldi. Sonyń biri – elordalyq Maıra Bekenova.

Ol qundylyqtardy bı arqyly nasıhattaý - jastar tárbıesinde úlken mańyzǵa ıe ekenin atap ótti.

«Osy kontsertke kegenime óte qýanyshtymyn. Respýblıka kúni qutty bolsyn! «Naz» memlekettik bı teatrynyń bıshileri - naǵyz kásibı mamandar. Olardyń ár kontsertine barýǵa, qatysýǵa tyrysamyn. Bizdiń qanshama dástúrimiz, saltymyz bar. Sol dástúrlerdi ártister bıdiń tilimen jitkizip otyr. Ony kórermen retinde men túsine bildim. Osyndaı qoıylymdarmen qundylyqtarymyzdy nasıhattasaq, erteń ol jastarymyzdyń sanasynda qalady degen senimdemin», - dep pikir bildirdi Astana qalasynyń turǵyny Maıra Bekenova.