Astanada Ulttyq ǵylymı medıtsınalyq ortalyqtyń 10 jyldyǵyna arnalǵan merekelik sharalar bastaldy
ASTANA. 7 qazan. QazAqparat /Aıdar Ospanalıev/ - Búgin elordadaǵy Beıbitshilik pen kelisim saraıynda Ulttyq ǵylymı medıtsınalyq ortalyqtyń 10 jyldyǵyna arnalǵan «Innovatsııalyq tehnologııalar men medıtsınadaǵy progress, Eýro-Azııalyq Respıratorlyq qoǵamnyń 7-shi kongressi» atty halyqaralyq kongrestiń ashylý rásimi ótti.
Aıtýly sharaǵa meıman retinde shaqyrylǵan Búkiálemdik densaýlyq saqtaý uıymy men Eýropa, AQSh, Azııanyń jáne TMD memleketteriniń medıtsınalyq ortalyqtarynyń jetekshi ǵalymdary qatysty. Jıynǵa sondaı-aq elimizdiń medıtsına salasynyń mamandary men birqatar memlekettik organdardyń jáne vedomstvolardyń basshylary qatysty. Búgingi merekemen medıtsına mamandaryn Prezıdent Ákimshiliginiń Іshki saıasat bóliminiń meńgerýshisi Darhan Myńbaı quttyqtady. Sondaı-aq onda arnaıy sóz sóılegen Astana qalasy ákiminiń orynbasary Aıda Balaeva elorda ákimi Imanǵalı Tasmaǵambetovtyń quttyqtaýyn jetkizdi. Medıtsına mamandaryna júrekjardy lebizin Bilim jáne ǵylym mınıstri Baqytjan Jumaǵulov ta joldady.
Merekeniń ashylý rásiminde sóz sóılegen Densaýlyq saqtaý mınıstri Salıdat Qaıyrbekova Prezıdentimizdiń azamattardyń densaýlyq saqtaý sharasynyń elimizdiń básekege qabiletti elderdiń qataryna qosylýdaǵy basty mindetterdiń biri retinde qarastyryp otyrǵandyǵyn atap kórsetti. «Táýelsizdik jyldarynda Qazaqstannyń densaýlyq saqtaý salasy eldiń ekonomıkalyq damýyna sáıkes, josparly túrde jetilip otyrdy. Osy jyldar aralyǵynda salany qarjylandyrý 10 esege artyp, medıtsına salasynyń materıaldyq-tehnıkalyq jaǵdaıy nyǵaıdy. Sonymen qatar 500-ge jýyq densaýlyq saqtaý nysany salynyp, 4 myńnan astam uıym kúrdelý jóndeýden ótti. Respýblıka boıynsha joǵary tehnologııalar engizilýde»,-deı kele mınıstr búgingi jıynǵa qatysýshylardy mereıtoımen quttyqtady.
Esterińizge sala keteıik, Ulttyq ǵylymı medıtsınalyq ortalyq medıtsına salasyna ınnovatsııalyq tehnologııalardy engizý arqyly osy salada kórsetiletin qyzmetterdiń sapasyn arttyrýǵa baǵyttalǵan serpindi jobalardy júzege asyrady. Ortalyqtyń jumysy jolǵa qoıylǵan on jyl ishinde 210 myń qazaqstandyq joǵary tehnologııaly medıtsınalyq kómekpen qamtyldy. Olardyń arasynda AQSh, Reseı, Túrkııa, Germanııa, Ulybrıtanııa Birikken Arab Ámirlikteri sııaqty memleketterdiń azamattary da bar. Búgingi kongres aıasynda sımpozıýmdar men sheberlik-synyptary, jas ǵalymdar baıqaýy, dóńgelek ústelder men álemniń jetekshi kompanııalarynyń medıtsınalyq qurylǵylarynyń jáne dári-dármekteriniń kórmesi uıymdastyrylady. Atalmysh shara medıtsına qyzmetkerleri, ǵalymdar men mamandarǵa otandyq jáne álemdik medıtsınanyń sońǵy jetistikterimen jáne joǵary tehnologııalarmen tanysýǵa múmkindik beredi.
