Astanada Ulttyq Delfıı oıyndary aıasynda «Shattyq» atty balalar baıqaýy ótýde
ASTANA. 14 aqpan. QazAqparat - Búgin Astanada Ulttyq Delfıı oıyndary aıasynda «Shattyq» atty balalar arasyndaǵy VI qalalyq baıqaý saltanatty túrde ashyldy.
Mahambet Ótemisuly atyndaǵy oqýshylar saraıynda ótip jatqan baıqaý Astana qalasynyń 7 myńnan astam oqýshylaryn biriktirip otyr.
Delfıı oıyndary bizdiń zamanymyzǵa deıingi 582 jyly Grekııadan bastaý alyp, álemdik mádenıetpen elimizde bite qaınasýyna, dástúrli túrde ótkizilýine Qazaqstan Prezıdenti N.Nazarbaevtyń qoldaýy úlken áser etti. Daryndy balalardy shyńdaıtyn delfıılik oıyndar búginde jas talanttardyń asyǵa kútetin, ózderiniń shyǵarmashylyq múmkindikterin kórsetetin baıqaýǵa aınaldy. Qazaqstan jastary Halyqaralyq delfıı oıyndaryna 2002 jyldan beri belsendi túrde qatysyp, júldeger de bolyp júr.
«Bul sharanyń eń basty maqsaty -daryndy balalardy qoldaý jáne ulttyq salt-dástúrlerdi damyta otyryp, jastardyń toleranttyq rýhtaryn nyǵaıtý», - dedi baıqaýdyń ashylý saltanatynda Astana qalasy Bilim basqarmasy bastyǵynyń orynbasary Rıma Imanǵazınova.
Qazirgi jáne jańa zaman óneriniń barlyq úlgilerin biriktiretin Delfıı oıyndarynyń talaptaryna saı uıymdastyrylǵan baıqaý aspaptar, hor, vokal, mánerlep oqý, horeografııa, beıneleý jáne sýret syndy óner túrlerin qamtyp, 7 janrdyń 13 atalymy boıynsha ótedi.
Baıqaýda 30 altyn, 30 kúmis, 30 qola medal sarapqa salynatyn bolady. Sonymen qatar júzden júırik, myńnan tulpar atanyp, medal enshilegen jeńimpazdardy ónerge baýlyp, dúbirli dodaǵa daıyndaǵan eńbekteri úshin ustazdarǵa 90 sertıfıkat tabys etilmek.
