Astanada Ulttyq ulan jaýyngerleri órt shyqqan meıramhanadan azamattardy alyp shyqty

ASTANA. KAZINFORM – 12 qazan kúni saǵat 20.00 shamasynda Astana qalasynda Esil jaǵalaýyndaǵy meıramhanalardyń biri órtendi. Ulandyqtar azamattardy aman alyp shyqty, – dep habarlaıdy Polisia.kz. 

Sol mańda qoǵamdyq tártip pen qaýipsizdikti qamtamasyz etip júrgen QR ІІM Ulttyq ulanynyń sarbazdary oqıǵa ornyna alǵash bolyp jetti. Kapıtan D. Baken bastaǵan áskerı jasaq jaýyngerleri birden meıramhana qyzmetkerlerin qaýipsiz jerge shyǵardy. Dereý órt sóndirý qyzmetine jáne quqyq qorǵaý organdaryna habar berdi. Bul ýaqytta ózge jasaqtar ýaqyt joǵaltpaı asúıge ótip, jarylystyń aldyn alý maqsatynda gaz ballondardy da órtten qashyq jerge alyp shyqty.

– Qala kósheleriniń tynyshtyǵyn qamtamasyz etý kezinde Mámbetov kóshesi 3 mekenjaıynda ornalasqan meıramhanadan shyqqan tútindi baıqadyq. Patrýldik top bastyǵy Jansúgirovtiń basshylyǵymen, áskerı jasaqtar órt aýmaǵyn qorshaýǵa alyp, tıisti sharalarǵa kiristi. Oqıǵa ornyna órt sóndirý tobyn shaqyrdyq. Olarmen qatar tártip saqshylary da jumys istep jatyr, - deıdi Ulttyq ulan ofıtseri.

Órttiń shyǵý sebepteri anyqtalyp jatyr. Zardap shekkender joq.