Astanada «Ulttyq ulan — el aıbyny» patrıottyq muraly ashyldy
ASTANA. KAZINFORM - Elordada Saryarqa aýdany ǵımarattarynyń biriniń qasbetinde Qazaqstan Respýblıkasy ІІM Ulttyq ulany áskerı qyzmetshileriniń qyzmettik-jaýyngerlik is-áreketine arnalǵan «Ulttyq ulan — el aıbyny» patrıottyq mýralynyń saltanatty ashylýy ótti.
Ulttyq ulannyń baspasóz qyzmeti málimetinshe, mýraldy saltanatty túrde ashý qurmeti qyzmet barysynda qyraǵylyq pen janqııarlyq tanytqan qos sarbaz — Danııal Sársenǵalıev pen Nurjan Jumabekulyna berildi. Danııal Sársenǵalıev taıaýda epılepsııalyq ustamasy bar qyzǵa jedel medıtsınalyq kómek kórsetken bolatyn. Al Nurjan Jumabekuly «Sharyn» bazaryndaǵy órtti baıqaǵan boıda tıisti qyzmetterge ýaqytyly baıandap, oqıǵa ornyna qosymsha kúsh shaqyryp, qaýip aımaǵyna dereý qorshaý uıymdastyrǵan.
Óner nysany Seıfýllın 9/1 jáne Kýbrın 22/1 kósheleriniń qıylysynda ornalasqan alańdaǵy ǵımarat syrtyna erekshe reń berdi. Ol ulandyqtardyń qoǵamdyq qaýipsizdikti qamtamasyz etýge, óskeleń urpaqty otansúıgishtik pen adaldyq rýhynda tárbıeleýge qosqan úlesin moıyndaýdyń sımvolyna aınaldy.
Mýraldyń salynýyna Saryarqa aýdanynyń ákimdigi birlesip, Ulttyq ulan bastama kóterdi.
— Bul týyndy — bizdiń áskerı qyzmetshilerimizge degen alǵystyń belgisi. Óner arqyly kúndiz-túni turaqtylyq pen tártiptiń saqshysy, tynyshtyqtyń qalqany bolǵan jandar týraly aıtamyz. Mýral jastardy patrıottyq tárbıeleýdiń mańyzdy elementine aınalatynyna jáne Otan aldyndaǵy boryshyn eske salatynyna senimdimin, - dedi Ulttyq ulan Bas qolbasshysynyń tárbıe jáne áleýmettik-quqyqtyqtyq jumystar jónindegi orynbasary Qaırat Úmbetov.
Saryarqa aýdany ákiminiń orynbasary Dinmuhammed Quldashov óz sózinde jobanyń mádenı jáne tárbıelik mańyzyn atap ótti.
— Biz qalanyń syrtqy kelbetin jaqsartyp qana qoımaı, ony tereń mazmunmen toltyrýǵa tyrysamyz. Bul mýraldyń paıda bolýy áskerı qyzmetke jáne mańyzdy mindet atqaratyndarǵa qurmetpen qaraýdy qalyptastyrýdaǵy oń qadam dep bilemiz. Sondaı-aq, qalamyzdyń ózindik bolmysynyń bir bóligi jáne aýdan turǵyndary úshin maqtanysh nysanyna bolaryna kúmán joq, - dedi ol.
Aıta ketý kerek, mýral aýdan arhıtektýrasyna úılesimdi túrde enip, elorda kóshesiniń jarqyn ekpinine aınaldy. Grafıkalyq sýret elorda turǵyndary men qonaqtarynyń qyzyǵýshylyǵyn týdyrdy. Bul — kún saıyn el qaýipsizdigin qamtamasyz etetinder úshin úlken maqtanysh.
Eske salaıyq, Semeıde polıtsııa qyzmetkerlerine arnalǵan mýral paıda boldy.