Astanada Ulttyq sport túrleri men mádenıeti akademııasy quryldy

ASTANA. KAZINFORM — Búgin Ulttyq akademııalyq kitaphananyń Farıza Ońǵarsynova zalynda «Ulttyq sport túrleri men mádenıeti akademııasy» quryldy. Bul týraly «Naýryzym – nurly yrysym» merekelik is-sharasy aıasynda ótken jıynda belgili kúsh mádenıetin zertteýshi, joba quryltaıshysy Abylaıhan Qalnazarov málim etti. 

Астанада Ұлттық спорт түрлері мен мәдениеті академиясы құрылды
Фото: Ұлттық академиялық кітапхана

— Ulttyq sport túrleri men mádenıeti akademııasy — qazaq halqynyń barlyq dástúrli sportyn saqtaý, damytý jáne halyqaralyq deńgeıde tanymal etýge baǵyttalǵan ınnovatsııalyq ortalyq. Bul akademııa ulttyq sport túrleriniń fızıkalyq, rýhanı-mádenı jáne zııatkerlik qundylyqtaryn zerttep zerdelep, bolashaq urpaqqa jetkizýdi jáne sport arqyly eldik rýhty kúsheıtýdi kózdeıdi, — dep atap ótti A.Qalnazarov.

Onyń baıandaýynsha, akademııa mıssııasy — qazaq halqynyń dástúrli sport túrlerin jańǵyrtý jáne olardy eldik-álemdik masshtabtarda ilgeriletý arqyly ulttyq muranyń sporttyq-mádenı damýyna úles qosý.

Maqsat-mindetteri:

— Ulttyq sport túrlerin kásibı deńgeıde damytyp, jattyqtyrýshylar men sportshylardy daıyndaý.

— Ulttyq sport túrleriniń biregeı tehnıkasy men ádisterin ǵylymı negizde zertteý.

— Jastar arasynda salaýatty ómir saltyn nasıhattaý jáne ulttyq qundylyqtardy dáripteý.

— Dástúrli sport túrlerin halyqaralyq deńgeıde tanymal etý.

— Ulttyq sport pen mádenıetti biriktirip, ıntegratsııalyq is-sharalar uıymdastyrý.

Jumystyq mindetteri:

— Zertteýshilik.

— Uıymdastyrýshylyq.

— Ideologııalyq.

— Nasıhat.

— Oqytý.

— Baýlý.

Al akademııa qyzmetiniń baǵyttary negizgi ulttyq sport túrleri boıynsha keshendi baǵdarlamalar ázirlep, olardyń árqaısysyn derbes damytýdan kórinbek. Mysaly, qazaq kúresi boıynsha kásibı balýandardy daıyndaý, oblystyq, respýblıkalyq jáne halyqaralyq týrnırler ótkizý, qazaq kúresiniń erejelerin halyqaralyq standarttarǵa beıimdeý bolmaqshy. Osy qatarda kókpar, báıge, jamby atý, aýdaryspaq, teńge ilý, sadaq atý, qusbegilik, toǵyzqumalaq, asyq atý syndy sport túrleri bar.

Astanada Ulttyq sport túrleri men mádenıeti akademııasy quryldy
Foto: Ulttyq akademııalyq kitaphana

Abylaıhan Mamyraıhanulynyń aıtýynsha, bilim berý jáne ǵylymı-zertteý baǵyty basty basymdyq. Bilim berýde ulttyq sport túrleri boıynsha balalar, jastar jáne kásibı sportshylarǵa arnalǵan oqý baǵdarlamalaryn ázirleý, jattyqtyrýshylar men ádiskerlerdi oqytý kózdeledi.Ǵylymı zertteýde ulttyq sport túrleriniń tehnıkalyq jáne tarıhı erekshelikterin, fızıkalyq jáne psıhologııalyq artyqshylyqtaryn zertteý, qazaq halqynyń sporttyq tarıhyna arnalǵan ǵylymı eńbekter jarııalaýǵa basa mán berilmek.

Sondaı-aq ol qazirdiń ózinde óz avtorlyǵynda buǵan deıin jaryq kórgen «Balýan tas» qostomdyǵynyń úshinshi tomy, osy tomdardan órbigen ıdeologııalyq «Balýandar álemi» kitaby, kókpar týraly tórt tomdyq jáne «Qazaq kúresiniń» balalarǵa arnalǵan oqýlyǵy men palýandyq pen batyrlyqty nasıhattaıtyn oqýshylarǵa arnalǵan 3 kitaptyń ázir turǵanyn baıandady.

Astanada Ulttyq sport túrleri men mádenıeti akademııasy quryldy
Foto: Ulttyq akademııalyq kitaphana

— Ázirshe akademııa «Silteme.kz» portaly janynan qurylyp otyr. Aldaǵy ýaqytta bir top mamandardyń basyn qosyp, fond túrinde áreket etpekpiz. Mundaǵy fıshka sol, mádenıet jáne týrızm is-sharalary da nazarda bolady. Ulttyq sport pen mádenıettiń sıntezin kórsetetin etnofestıvalder uıymdastyrý, Naýryz jáne basqa ulttyq merekelerde arnaıy sporttyq is-sharalar ótkizý josparda bar. Qazaqtyń dástúrli ómir saltyn kórsetetin etnoaýyl qurý, týrısterge arnalǵan ınteraktıvti baǵdarlamalar uıymdastyrýdy da kózdeýdemiz. Ǵylymı-zertteý ortalyqtary, sport keshenderi máselelerine de den qoıamyz. Bul jaǵynan birqatar ulttyq sport federatsııalarymen aldyn ala yntymaqtastyq jóninde áńgimeler júrgizildi, — dep túıindedi sózin A.Qalnazarov.

Aıta keteıik, atalmysh is-sharaǵa birqatar tanymal tulǵalar jáne stýdentter men mektep oqýshylary qatysty. Bul Ulttyq akademııalyq kitaphananyń naýryz merekesine oraı belgilengen «Shańyraq» kúniniń de mereıin asyrýǵa baǵyttalǵan otyrystardyń biri bolatyn.

Jıyn sońynda kelýshilerge naýryz kóje berilip, baýyrsaq taratyldy. 

Buǵan deıin habarlanǵandaı, mádenıet jáne ulttyq salt-dástúr kúni atalyp ótti.

Сейчас читают