Astanada Ulttyq mektep lıgasynyń fınaldyq kezeńi ótti

ASTANA. KAZINFORM – Astanada Qazaqstan Ulttyq Olımpıadalyq komıtetiniń qoldaýymen eldegi mektep sporty salasyndaǵy eń iri jobalardyń biri – Ulttyq mektep lıgasynyń fınaldyq kezeńi ótti.

QR UOK málimetinshe, atalǵan is-shara búkil Qazaqstandy qamtıdy. Al osyjyldyń fınaldyq kezeńi Astana, Almaty jáne Taldyqorǵanda uıymdastyrylyp, túrli óńirlerden kelgen jas sportshylardy biriktirdi.

Ulttyq mektep lıgasynyń baǵdarlamasyna birneshe sport túri kiredi: ústel tennısi, basketbol, voleıbol, toǵyzqumalaq, fýtzal, jeńil atletıka, gandbol, asyq atý, shahmat jáne fýtbol.

Bul respýblıkalyq sporttyq sharaǵa 5-11 synyp oqýshylary qatysady. Bul jas urpaqtyń sporttyq qabiletin damytýǵa jáne salaýatty ómir saltyn qalyptastyrýǵa jaǵdaı jasaıdy. Jalpy, lıganyń barlyq kezeńine 2 mıllıonnan astam oqýshy qatysqan.

Bıyl lıga Halyqaralyq Olımpıada kúnine arnalǵan is-sharalar aıasynda ótkizilip jatyr. Qazaqstan Ulttyq Olımpıadalyq komıteti bul jobanyń seriktesi retinde jastardy sportqa tartýǵa baǵyttalǵan bastamalardy qoldap otyr.

– Ulttyq olımpıadalyq komıtet Ulttyq mektep lıgasynyń ótýine qoldaý kórsetýdi jón kórdi. Sebebi onyń maqsaty Olımpıadalyq qozǵalystyń negizgi qundylyqtary: adaldyq, dostyq, teńdik, batyldyq jáne tabandylyqpen tolyq sáıkes keledi. Bul – mektep oqýshylaryn sportqa tartýǵa jáne olarda erte jastan salaýatty ómir saltyn qalyptastyrýǵa múmkindik beretin mańyzdy alań, – dep atap ótti UOK ókilderi.

Astanada voleıbol, basketbol jáne ústel tennısi boıynsha lıga jeńimpazdary anyqtaldy. Al gandbol, asyq atý jáne basqa jas sanattary arasyndaǵy voleıbol jarystary áli de jalǵasyp jatyr.

Mektep lıgasynan bólek, Olımpıada kúni aıasynda sý dobynan, ashyq sýda júzýden jáne trıatlonnan jarystar ótedi.

Aıta keteıik, Halyqaralyq Olımpıada kúni jyl saıyn 23 maýsymda atap ótiledi.

Eske salaıyq, Qazaqstan hokkeı quramasy búgin Shveıtsarııamen kezdesedi.