Astanada Ulttyq quryltaı sektsııalarynyń otyrysy ótti
ASTANA. KAZINFORM — Memlekettik keńesshi Ulttyq quryltaı múshelerine prezıdenttik reformalardyń mańyzdylyǵy men nátıjeleri týraly aıtty. Bul týraly Aqordanyń baspasóz qyzmeti habarlady.
Astanada Ulttyq quryltaı sektsııalarynyń otyrysy ótti.
Jıynda Memlekettik keńesshi Erlan Qarın jyldyń negizgi qorytyndylaryna toqtaldy. Ol ekonomıka turaqty ósim kórsetkenin, jańa kásiporyndar iske qosylyp, turaqty jumys oryndary qurylǵanyn, áleýmettik nysandar qurylysy qarqyn alyp, kólik ınfraqurylymyn jańǵyrtý isi jalǵasyp jatqanyn atap ótti.
Sondaı-aq Memlekettik keńesshi Prezıdent bastamashylyq etken parlamenttik reforma «Kúshti Prezıdent — yqpaldy Parlament — esep beretin Úkimet» memlekettik qurylystyń bazalyq formýlasy aıasyndaǵy aýqymdy saıası jańǵyrýdyń logıkalyq jalǵasy ekenin aıtty.
— Usynylyp otyrǵan reforma zań shyǵarýshy bılikti qaıta jańǵyrtýǵa ári onyń tıimdiligin arttyrýǵa baǵyttalǵan. Bul rette saıası bastama Parlament qyzmetin ózgertýmen ǵana shektelmeıdi, eldiń konstıtýtsııalyq qurylymynyń irgeli negizderin de qamtıdy. Negizgi zańnyń keminde 40 babyna ózgerister engiziledi dep kútilip otyr. Atalǵan reforma 2022 jylǵy konstıtýtsııalyq ózgeristermen keshendi túrde birge júzege asyrylady jáne múlde jańa saıası modelge kóshýge jol ashady, — dedi Memlekettik keńesshi.
Erlan Qarın Memleket basshysynyń tapsyrmalary men Býrabaıda ótken IV otyrysta Ulttyq quryltaı músheleri tarapynan aıtylǵan bastamalarǵa toqtaldy.
Olardy júıeli túrde iske asyrý úshin 53 tarmaqtan turatyn arnaıy jospar qabyldandy. Onda túrli baǵyt boıynsha 10 zań jobasyn ázirleý kózdelgen.
Ulttyq quryltaı bastamalary aıasynda birqatar mańyzdy tujyrymdamalyq qujat ázirlendi. Máselen, ishki saıasattyń negizgi qaǵıdattary men baǵyttaryn aıqyndaıtyn tujyrymdamalyq qujat daıyndaldy. 2026-2028 jyldarǵa arnalǵan Nashaqorlyqqa jáne esirtki bıznesine qarsy kúres jónindegi keshendi jospar bekitildi. 2025-2030 jyldarǵa arnalǵan Qazaqstan Respýblıkasynyń óńirlik damý tujyrymdamasy qabyldandy.
«100 kitap» jalpyulttyq saýalnamasy, «Asyl mura» aýdıo jınaǵy sekildi mańyzdy mádenı-gýmanıtarlyq jobalar júzege asyryldy. Sondaı-aq «Handar shejiresi» qoljazbasy ıÝNESKO-nyń «Álem jady» halyqaralyq tizilimine engizildi.
Memlekettik keńesshi Ulttyq quryltaı bastamalaryn iske asyrý jumysy jalǵasyp jatqanyn atap ótti. Dálirek aıtqanda, balalardyń quqyqtaryn qorǵaýǵa baǵyttalǵan sharalardyń barlyǵyn biriktiretin «Qazaqstan balalary» birtutas baǵdarlamasy ázirlenýde, ǵylymı qalashyqtar qurý, úkimettik emes uıymdardyń qyzmetin retteý, erekshe qajettilikteri bar balalardy keshendi qoldaý jáne basqa da baǵyttar boıynsha zańnamalyq normalar daıyndalyp jatyr.
Bastamalar men usynystardy iske asyrý máseleleri Ulttyq quryltaıdyń «Azamattyq qoǵam», «Áleýmettik-ekonomıkalyq jáne mádenı damý», «Bilim jáne ǵylym» atty jumys sektsııalarynda talqylandy.
Sektsııalarǵa Prezıdent kómekshisi Arman Qyryqbaev, Premer-mınıstrdiń orynbasary — Mádenıet jáne aqparat mınıstri Aıda Balaeva, Ǵylym jáne joǵary bilim mınıstri Saıasat Nurbek, Oqý-aǵartý mınıstri Juldyz Súleımenova moderatorlyq etti.
Sektsııalar aıasynda Ulttyq quryltaı músheleri Prezıdent bastamalarynyń júzege asyrylýyn qoldap, jekelegen baǵyttarǵa qatysty usynystarymen bólisti.
Ulttyq quryltaı músheleri tarapynan aıtylǵan usynystar Hatshylyqta jınaqtalyp, Ulttyq quryltaıdyń kelesi otyrysynda qarastyrý úshin múddeli memlekettik organdarmen talqylanatyn bolady.
Ulttyq quryltaıdyń V otyrysyn kelesi jyly Qyzylorda qalasynda ótkizý josparlanyp otyr.