Astanada «Ult jaýhary» atty zergerlik kórme ashyldy
ASTANA. 5 sáýir. QazAqparat - Astanada Ulttyq akademııalyq kitaphanada «Ult jaýhary» atty kórme ótýde.
Atalǵan kórme «Ádemi-Aı» óner murajaıynyń «Etnodızaınqazaq-2030» birlestigimen birlese jasaǵan jobasy.
Kórme zalyna kúmispen kúptelgen qyryqqa jýyq baǵaly buıymdar qoıylǵan. Kórkemdik kemeline keltirilgen erdiń kemer beldikteri men qyzdardyń sholpylary, moıynǵa iler alqalary eshbir jandy beı-jaı qaldyrmaıdy. Ásirese, bul kórmede qazaqtyń qyz-kelinshekterine arnalǵan áshekeı buıymdarǵa erekshe kóńil bólingen. Máselen, ekspozıtsııadan XIX ǵasyrda qazaq sheberleriniń qolynan shyqqan tamaqsha, tumarsha, úkitaıaq, qosbilezik, qudaǵı júzik, syrǵa syndy kúmis áshekeılerdi tamashalaýǵa bolady. Olardyń deni zergerlik buıymdaryna naqyshtaý, sirkeleý, oıyp kúmisteý tásilderimen jasalǵan.
Kez-kelgen buıymdar ata-babamyzdyń qoldanǵan, jaratqan dúnıeleri jańasha, zamanaýı úlgide jasalǵan úlgileri de kelýshilerdiń nazaryna usynylǵan. «Ádemi-Aı» kompanııasy sońǵy 10 jyl kóleminde ult muralaryn zamanaýı tehnologııalarmen jańǵyrtyp, halqymyzdyń salt-dástúrine saı jasalǵan kádesyılardy halyqqa usynyp keledi. Esterińizge sala ketsek, 2010 jyly «Ádemi-Aı» kompanııasynyń dırektory, Qazaqstan Respýblıkasynyń Mádenıet qaıratkeri, ónertanýshy, kollektsıoner Bahargúl Tólegenqyzy 1000-nan astam jádigeri qoıylǵan «Ádemi-Aı» óner murajaıyn ashqan bolatyn. Búgingi kúnge deıin murajaı kóne jádigerlermen tolyǵýda.
«Ádemi-aı» kompanııasy bıylǵy jyly shyǵarmashylyq jumystarǵa basymdyq bere otyryp, jańa ónimderiniń qataryn kóbeıtti. Olardyń qatarynda, qazaq eliniń tarıhynan syr shertip, búgingi kelbetin beıneleıtin «Qazaqstan tarıhy» tabaqshasy, «Naýryz», «Jeti qazyna», «Ertoqym» kartınalary, zergerlik áshekeıler, jibekten jasalǵan toqyma buıymdar, óńirlerge arnalǵan tabaqshalar toptamasy bar.
