Astanada «Ult jaýhary» atty kórme ótedi
ASTANA. 4 sáýir. QazAqparat - 5 sáýir kúni «Ádemi-aı» kompanııasy men «Ádemi-Aı» óner murajaıy Qazaqstan Respýblıkasynyń Ulttyq akademııalyq kitaphanasy jáne «Etnodızaınqazaq 2030» birlestigimen birlesip «Ult jaýhary» atty kórme ótkizedi.
Kórmege belgili qoǵam qaıratkerleri, parlament depýtattary, QR Prezıdentiniń janyndaǵy Áıelder isteri jáne otbasylyq-demografııalyq saıasat jónindegi Ulttyq komıssııa músheleri jáne BAQ ókilderi qatysady.
Kórme Naýryz merekesine baılanysty uıymdastyrylyp otyr, onda kóne jádigerler men jańa kádesyılar toptamasy usynylady.
«Ádemi-Aı» kompanııasy sońǵy 10 jyl kóleminde ult muralaryn zamanaýı tehnologııalarmen jańǵyrtyp, halqymyzdyń salt-dástúrine saı jasalǵan kádesyılardy halyqqa usynyp keledi. Esterińizge sala ketsek, 2010 jyly «Ádemi-Aı» kompanııasynyń dırektory, Qazaqstan Respýblıkasynyń Mádenıet qaıratkeri, ónertanýshy, kollektsıoner Bahargúl Tólegenqyzy 1000-nan astam jádigeri qoıylǵan «Ádemi-Aı» óner murajaıyn ashqan bolatyn. Búgingi kúnge deıin murajaı kóne jádigerlermen tolyǵýda.
«Ádemi-aı» kompanııasy da bıylǵy jyly shyǵarmashylyq jumystarǵa basymdylyq bere otyryp, jańa ónimderiniń qataryn kóbeıtti. Olardyń qatarynda, qazaq eliniń tarıhynan syr shertip, búgingi kelbetin beıneleıtin «Qazaqstan tarıhy» tabaqshasy, «Naýryz», «Jeti qazyna», «Ertoqym» kartınalary, zergerlik áshekeıler, jibekten jasalǵan toqyma buıymdar, óńirlerge arnalǵan tabaqshalar toptamasy, qazaq halqynyń soǵys qarýlary men saz aspaptary úlgisinde jasalǵan flesh-kartalar bar.
