Astanada «Uly dala» shyǵarmashylyq baıqaýynyń jeńimpazdary marapattaldy
ASTANA. KAZINFORM — Elordadaǵy Qalıbek Qýanyshbaev atyndaǵy teatrda «AMANAT» partııasy uıymdastyrǵan dástúrli «Uly dala» respýblıkalyq shyǵarmashylyq baıqaýy qorytyndylandy. Bıyl baıqaý Abaı Qunanbaıulynyń 180 jyldyǵyna arnaldy, dep habarlaıdy partııanyń baspasóz qyzmeti.
Májilis Spıkeri, «AMANAT» Tóraǵasy Erlan Qoshanov partııa «Uly dala» baıqaýyn altynshy márte ótkizip otyrǵanyn jáne jyl ótken saıyn onyń aýqymy keńeıip kele jatqanyn atap ótti. Bıyl baıqaý alǵash ret óńirlik deńgeıde ótkizildi. Osy ýaqyt aralyǵynda 100-ge jýyq jas aqyn-jazýshy konkýrs laýreaty atanyp, búginde keńinen tanymal qalamgerlerge aınalyp otyr.
– Memleket basshysy Qasym-Jomart Toqaev rýhanııatqa erekshe kóńil bóletinin jaqsy bilesizder. Prezıdentimiz halqymyzdyń ozyq oıly, ıntellektýaldy ult bolǵanyn qalaıdy. Bul týraly Ulttyq quryltaılarda, basqa da jıyndarda únemi aıtyp ta júr. Endigi jas tolqynnyń mindeti – keshegi qazaq ádebıeti jetken bıikten alasarmaý, jańa kókjıekke umtylý. Al bizdiń mindetimiz – osy jastarǵa qoldaý kórsetý, jolyn ashý. Búgingi «Uly dala» baıqaýy – sonyń jarqyn kórinisi, «AMANAT» partııasynyń qazaq rýhanııatyna qosyp jatqan bir úlesi, – dedi Erlan Qoshanov.
Partııa Tóraǵasy taıaýda Prezıdent Jarlyǵymen ishki saıasattyń negizgi qaǵıdattary, qundylyqtary men baǵyttary bekitilgenin eske saldy. Osy mańyzdy qujatta Abaıdyń «Qara sózderi» ulttyq kitap nyshany retinde aıqyndaldy. Sondyqtan bul baıqaý uly qalamger shyǵarmashylyǵynyń tereń mazmuny men aıryqsha mańyzyn ashýǵa baǵyttalyp, kópshiliktiń qyzyǵýshylyǵyn oıatty.
Májilis Spıkeri memleket tarapynan qalamgerlerge jan-jaqty qoldaý kórsetilip kele jatqanyna nazar aýdardy. Máselen, 2023 jyldan beri elimizdegi jas aqyn-jazýshylarǵa Prezıdenttiń arnaýly ádebı syılyǵy taǵaıyndalady, «Aıboz» ulttyq ádebı syılyǵy tabystalady, sondaı-aq jyl saıyn el aýmaǵynda kóptegen konkýrstar men shyǵarmashylyq is-sharalar ótkiziledi. Jýyrda aýqymdy saýalnama aıaqtaldy. Nátıjesinde, otandyq ádebıettegi úzdik 100 kitap anyqtalyp, keńinen nasıhattalýda.
Erlan Qoshanov «AMANAT» partııasy tarapynan ádebıetti qoldaý baǵytynda atqarylyp jatqan jumystarǵa da toqtaldy. Onyń aıtýynsha, Májilistegi partııa fraktsııasy kótergen bastama nátıjesinde jańa Salyq kodeksinde otandyq baspagerler úshin qosymsha qun salyǵy alynyp tastaldy. Bul qadam kitaptardy oqyrmanǵa barynsha qoljetimdi etýge múmkindik beredi. Sondaı-aq «Kitap oqıtyn ult» bastamasy men «Kitap-AMANAT» jobasy júıeli túrde júzege asyrylýda. Osyndaı is-sharalar arqyly azamattardyń boıynda kitap oqý mádenıeti qalyptasyp, kitapqa degen qurmeti artady.
Eń bastysy, búginde el azamattary kitap oqý isine joǵary qyzyǵýshylyq tanytýda. Sonyń jarqyn kórsetkishi retinde bıyl 11 aıda kitaphanalarǵa 37 mıllıon adam bardy. Olardyń ortasha jasy – 17-25.
Bıyl «Uly dala» baıqaýy 1 shilde men 30 qazan aralyǵynda ótkizildi. Osylaısha 120 shyǵarma aqtyq kezeńge joldanyp, onyń barlyǵy aikyn.kz saıtynda «Uly dala baıqaýy» arnaıy aıdarymen ornalastyryldy: https://aikyn.kz/uly-dala-baikauy.
«Poezııa» atalymy boıynsha birinshi oryndy Azamat Serikuly, ekinshi oryndy – Asantemir Qarshyǵauly, úshinshi oryndy – Abzal Maqash ıelendi.
«Proza» atalymy boıynsha júldeli birinshi oryndy – Jaqsylyq Qazymurat, ekinshi oryndy – Dýman Terlikbaev, úshinshi oryndy – Retbek Maǵaz qanjyǵalady.
«Balalarǵa arnalǵan shyǵarma» atalymynda Nurbek Nurjanuly jeńimpaz atansa, ekinshi oryndy – Aıdana Segizbaı, úshinshi oryndy – Quralaı Omar ıelendi.
«Dramatýrgııa» atalymy boıynsha birinshi oryn – Eldar Toqtasynǵa, ekinshi oryn – Mııa Alǵojaevaǵa, úshinshi oryn – Gúljanat Isataıqyzyna buıyrdy.
«Ádebı syn» atalymy boıynsha birinshi oryn – Darııa Kelgenge, ekinshi oryn – Aıgúl Sákenqyzyna, úshinshi oryn – Qarlyǵash Qabaıǵa tabystaldy.
Sondaı-aq «Abaı Qunanbaıulynyń 180 jyldyǵy» arnaıy syılyǵyn – Ularbek Dáleıuly, «Alash amanaty» arnaıy syılyǵyn – Ádilet Jaǵypar, «Mirjaqyp Dýlatulynyń 140 jyldyǵy» arnaıy syılyǵyn – Anar Abdýllına ıelendi.
Іs-shara sońynda barlyq qatysýshy rejısser Álimbek Orazbekovtiń áıgili «Abaı» tragedııasyn tamashalady.
Budan buryn astanalyq stýdentter «Men kásipkermin» respýblıkalyq baıqaýynda úzdik atanǵanyn jazǵan edik.