Astanada «Úlgili sot» jumysy tanystyryldy

ASTANA. QazAqparat - Elordanyń «Saryarqa» aýdandyq soty sot tóreligin júzege asyrý protsesterin jetildirý úshin ilki sot dep belgilengen bolatyn. Búgin QR Joǵarǵy soty Sottardyń qyzmetin qamtamasyz etý departamentiniń basshysy Nurserik Sháripov ilki sottyń jumysymen  tanystyrdy, dep habarlaıdy QazAqparat tilshisi. 

«Aǵymdaǵy jyldan bastap úlken bastamalardy qolǵa alyp, sot júıesiniń  damý joldaryn, baǵyttaryn qarastyrýdamyz. Jyl basynan jobalyq tártippen qaralatyn baǵyttardy aıqyndaý barysynda kóptegen úndeýler jarııalandy. Bizge kóptegen usynystar túsip jatyr. 1,5 aıdyń ishinde halyqtan, advokattardan, jalpy sotqa júginýshi tulǵalardan myńnan asa usynys tústi. Sot júıesin odan ary damytý baǵyttaryna arnaıy jobalyq keńse ashyldy. Onda biz 7 baǵdarlama qurdyq. Olar: «Minsiz sýdıa», «Úlgili sot», «Sapaly nátıje», «Ońtaıly orta», «Tatýlasý», «Sottan sotqa deıin», «Smart sot». Qazir osynyń barlyǵy júzege asyrylýda», - dedi ol.

Osy rette departament basshysy qazirgi zamanǵy sottyń bet-álpeti qandaı bolýy kerektigine toqtaldy.

«Balansymyzda ǵımarattar bolǵanymen, olardyń barlyǵy eski, tipti 1914 jyly salynǵany da bar, standarttarǵa saı kelmeıdi. Biz qazir olardyń jańa kelbetin daıyndap, halyqqa yńǵaıly qylyp jasap jatyrmyz. Úlgili sot bolǵannan keıin ilki jobalarymyzdy osynda júzege asyrýdamyz. «Front-keńse», «Tatýlastyrýshy sýdıa», «Sýdıa kómekshisi» ilki jobalary júzege asyrylyp jatyr. Aldaǵy ýaqytta elimizdiń barlyq óńirinde engizýdi kózdep otyrmyz. Mundaı jumystar bastalyp ta ketti. «Front-keńseler» SQO-da, ShQO-da, Almaty jáne Pavlodar oblystarynda júzege asyryldy. «Úlgili sot» degenimiz osy»,-  dedi Nurserik Sháripov.

Aıta keteıik, 2300 sharshy metr aýmaqty quraıtyn ǵımaratta sýdıalar men sot qyzmetkerlerine arnalǵan 41 kabınet, 13 sot otyrysy zaly bar. Zaldar dybys-beınetirkeý júıelerimen 100 paıyz qamtylǵan. Sonymen qatar, medıatordyń, advokattyń, prokýrordyń kabıneti, aqparattyq dúńgirshek, 2 kútý zaly jumys isteıdi.