Astanada úleskerlerdiń problemasy qaraldy
ASTANA. QazAqparat - Astanada vedomstvoaralyq komıssııanyń kezekti otyrystarynda úleskerlik qurylysqa qatysýshylardyń máseleleri qaraldy, dep habarlaıdy Astana ákimdiginiń baspasóz qyzmeti.
1 aqpanda ótken vedomstvo aralyq komıssııa otyrysynyń qorytyndysy boıynsha jıynda «Terrıtorııa komforta 1» turǵyn úı kesheni qurylysy boıynsha máseleler sóz boldy. Atap aıtqanda, ınvestorlardyń nysandaǵy jaǵdaı týraly aqparaty eskerildi. Nysandy salýshy - «KazInvestKonstrakshn Grýpp» JShS.
Kompanııa ókilderiniń aıtýynsha, nysandy jobalaýǵa berilgen qaýly, 2 kezekpen bólip salý jospary bar, qujattama qurlysy normalary men erejelerine sáıkes keltirildi. Sondaı-aq qarjylyq operatsııalar týraly túsindirme berildi. Otyrys qorytyndysy boıynsha vedomstvoaralyq komıssııa KazInvestKonstrakshnGrýpp kompanııasynyń basshylyǵyna birqatar usynys jasady. Atap aıtqanda, jumys josparyn ázirleýdi aıaqtaý, Memlekettik saraptama qorytyndysyn alý, ǵımaratta tehnıkalyq tekserý júrgizý tapsyryldy.
Komıssııanyń kezekti otyrysyna «TamyzInvestGrýpp» AQ quryltaıshylary shaqyryldy.
Vedomstvoaralyq komıssııa tóraǵasy jergilikti atqarýshy organdardyń ruqsat qujattaryn rásimdeýge kómek kórsetýge daıyn ekendigin atap ótti.
Alaıda, atalǵan kompanııanyń quryltaıshylary men TQK ókilderi vedomstvoaralyq komıssııanyń kezekti otyrysyna qatysqan joq jáne osy komıssııanyń qurylysty aıaqtaýǵa qatysty josparlary boıynsha usynysy oryndalǵan joq.
Qazirgi kezde komıssııamen úlestik qurylysqa qatysýshylarǵa qalyptasqan jaǵdaıdy sheshýge kómektesý týraly másele qaralýda.
