Astanada úleskerler 4 mlrd teńge quıǵan turǵyn úı súrildi

ASTANA. KAZINFORM — Qazir Astana qalalyq polıtsııasy jaýapsyzdyq tanytqan qurylys kompanııasyna qatysty isti tergep jatyr. 

— «Asyl-NurQurylys» JShS qurylys kompanııasynyń basshylaryna qatysty qylmystyq is qaralyp jatyr. Kúdiktiler 300-den astam adamdy aldady degen boljam bar. Belgili bolǵandaı, atalǵan JShS ókilderi 2024 jyldyń naýryz aıynan bastap ruqsat qujaty bolmaǵanyna qaramastan, ınternet-platformalarda jarnama berip, «Mardan» turǵyn úı kesheni qurylysy júrip jatqan úıden páter brondaý týraly kelisimsharttar jasaǵan. Ýákiletti tulǵalar turǵyn úı kesheniniń qurylysyn aıaqtaý syltaýymen úleskerlerdiń jalpy somasy shamamen 4 mıllıard teńgeni ıemdengen. Astana qalasy ákimdigi sot sheshimimen aldanǵan turǵyndardyń múddesin qorǵaý úshin nysandy súrip tastady, — delingen habarlamada.

Aqparatta aıtylǵandaı, qalalyq Prokýratýra júrgizgen sotqa deıingi tergeý barysynda qurylys kompanııasy basshysynyń biri qamaýǵa alyndy, ekinshi basshyǵa izdeý salyndy.

— Qazir tergeý amaldary júrgizilip jatyr, qosymsha sot saraptamasy taǵaıyndaldy. Onyń qorytyndysy boıynsha kúdiktilerdiń is-áreketine túpkilikti quqyqtyq baǵa beriledi. Quqyq qorǵaý organdary kompanııa basshylarynyń is-áreketinen zardap shekken azamattardy Astana qalasy Polıtsııa departamentine, Seıfýllın kóshesi, 37 mekenjaıy boıynsha habarlasýdy suraıdy, — deıdi quqyq qorǵaý organynan.

Aıta keteıik, Qazaqstanda úleskerlerdi qoldaý ortalyǵy qurylady. Ol jerde azamattarǵa turǵyn úıdi qaýipsiz satyp alý jóninde keńes beriledi.