Astanada UQShU Ujymdyq qaýipsizdik keńesiniń sessııasy bastaldy
ASTANA. KAZINFORM – Elordada Ujymdyq Qaýipsizdik týraly shart uıymy Ujymdyq qaýipsizdik keńesiniń kezekti sessııasy bastaldy.
Jıynǵa Qazaqstan prezıdenti Qasym-Jomart Toqaev, Belarýs prezıdenti Aleksandr Lýkashenko, Qyrǵyzstan prezıdenti Sadyr Japarov, Tájikstan prezıdenti Emomalı Rahmon jáne Reseı prezıdenti Vladımır Pýtın UQShU bas hatshysy Imanǵalı Tasmaǵambetov qatysyp otyr.
Sondaı-aq, is-sharaǵa TMD Bas Hatshysy Sergeı Lebedev pen ShYU Bas hatshysy Chjan Mın shaqyrtý alǵan.
Buǵan deıin taraǵan resmı habarlamada Armenııa ókilderiniń esimderi atalǵan joq. Al Armenııa SІM baspasóz hatshysy Anı Badalıan Armenpress agenttigine eldiń Syrtqy ister mınıstri Ararat Mırzoıan Syrtqy ister mınıstrleri keńesi men Qorǵanys mınıstrleri keńesiniń, UQShU-ǵa múshe elderdiń Qaýipsizdik keńesteri hatshylary komıtetiniń otyrysyna qatyspaıtynyn málimdegen bolatyn.
Aıta ketý kerek, Qazaqstan 2024 jyldyń 1 qańtarynda UQShU-ǵa tóraǵalyq tizginin alǵan bolatyn.
Qazaqstannyń uıymǵa tóraǵalyǵy kezinde, naqty aıtsaq, 18 qarasha kúni BUU Bas Assambleıasynyń 79-sessııasy barysynda Birikken Ulttar Uıymy men Ujymdyq qaýipsizdik sharty uıymy arasyndaǵy yntymaqtastyq týraly qarar qabyldandy.
Qujatta UQShU óziniń bitimgershilik áleýetin jáne óńirlik qaýipsizdik pen turaqtylyq júıesin nyǵaıtýǵa, terrorızmge jáne uıymdasqan transulttyq qylmysqa qarsy is-qımylǵa, esirtki men qarýdyń zańsyz aınalymyna, zańsyz kóshi-qon men adam saýdasyna qarsy kúreske jáne Birikken Ulttar Uıymynyń maqsattary men erejelerin iske asyrýǵa járdemdesetin tabıǵı jáne tehnogendik apattardyń saldaryn joıýǵa eleýli úles qosatyny atap kórsetilgen.