Astanada Ýkraınadaǵy QR elshilgi bastamasymen túsirilgen fılmniń tusaýkeseri ótti
ASTANA. QazAqparat - Astanada «Qazaqstan» ortalyq kontsert zalynda Ýkraınadaǵy Qazaqstan elshiliginiń bastamasymen túsirilgen «Otan úshin otqa túskender» fılminiń tusaý keser rásimi ótti.
QR Prezıdentiniń qoldaýymen túsirilgen fılm - Ýkraınadaǵy QR Tótenshe jáne ókiletti elshisi Zaýytbek Turysbekovtyń ıdeıasy. Z.Turysbekovtyń aıtýynsha, fılmdi túsirýge qajetti materıaldardy jınaqtaýǵa 2 jyl ýaqyt ketken.
«Biz ata-babalyrymyzdyń arqasynda búginde beıbit aspan astynda kún keship jatyrmyz. Eger keshegi tarıhty alyp qaraıtyn bolsaq, Uly otan soǵysynyń qurmetti ardagerleri, biz sizderdiń arqalaryńyzda bul kúnge jettik. Biz sizderge árqashan alǵysymyzdy bildirýimiz kerek. Túsirilgen fılm - sol uly jeńiskerlerimizge kórsetilgen qurmettiń bir belgisi. Biz sizderdiń aldaryńyzda bas ıemiz, qurmetti ardagerler», - dedi Zaýytbek Turysbekov.
Fılm rejısseri Nazgúl Abýtrapovanyń aıtýynsha, bul fılm «ataq» úshin túsiriligen joq. «Men QR Prezıdenti Teleradıokesheninde qyzmet etemin. Erlan Bekhojınniń jetekshilik etýimen biz HHІ ǵasyr stýdııasyn ashtyq. Mendegi maqsat, tilek bireý, ol: Otanymyz máńgi tynysh, árqashan beıbitshilikte bolýy», - dedi ol.
Fılmniń tusaý keserine Májilis depýtaty Bahytbek Smaǵul, «QR Prezıdenti Teleradıo kesheniniń» bas dırektory Erlan Bekhojın qatysty. Jıynda fılmdi túsirýshilerge Aýǵan soǵysy ardagerleri qaýymdastyǵy atynan «Shapaǵat» medali tabys etildi. Ýkraınadaǵy QR Elshiliginiń arqasynda Qazaqstannan maıdanǵa attanǵan 106-kavalerııa, 102-atqyshtar dıvızııasy sarbazdary qurmetine memorıal ornatyldy.
