Astanada ýkraın aqyny Taras Shevchenkoǵa eskertkish ornatylady
Shara Ýkraınanyń mádenı-aqparattyq ortalyǵynda ótti. Elordadaǵy №47 orta mekteptiń oqýshylary aqynnyń óleńderin jatqa aıtyp, kóptiń qoshemeti men qurmetine ıe boldy.
«Jyl saıyn 9 naýryz kúni Taras Shevchenkonyń týǵan kúni atalyp ótedi. Taras Shevchenko Qazaqstan jerinde ómiriniń 10 shaqty jylyn ótkizgen. Búgingi shara aqynymyzdy eske alýǵa arnalǵan. Biz mundaı sharany jyl saıyn búkil Qazaqstan boıynsha ótkizemiz. Byltyr biz aqynnyń týǵan kúnin Astana, Almatyda, Qaraǵandy, Aqtaýda uıymdastyrsaq, bıyl Pavlodar, Petropavl, Qostanaı qalalarynda atap ótemiz», - dedi QR-daǵy Ýkraına isteri boıynsha ýaqytsha senimdi ókili Volodymyr Djıdjora.
Onyń aıtýynsha, qazirgi ýaqytta Astanada aqynǵa eskertkish ornatý jumystary júrgizilýde.
«Taras Shevchenkonyń eskertkishin Astanada turǵyzý - bul óte aýqymdy joba. Qazirgi ýaqytta eskertkish boı kóteretin oryn bólindi. Ol L.Gýmılev atyndaǵy EUÝ-niń mańynda bolady. Bizdiń bilýimizshe, eskertkish Qazaqstandaǵy qoıý qyzyl granıtten jasalady. Bizdiń birlese kótergen eskertkishimiz qazaqstandyq-ýkraınalyq dostyqtyń sımvoly bolady degen senimdemiz», - dedi Volodymyr Djıdjora.
Aıta keteıik, ómiriniń 10 jylǵa jýyq kezeńin Mańǵystaýda jer aýdarylyp júrip ótkizgen aqyn ári sýretshi T.Shevchenko jergilikti halyqtyń tirshiligine, salt-dástúrine qatysty mol mura qaldyrǵan. Qalamgerlikpen qatar sýretshi retinde de tanylǵan ol qazaq ómirine qatysty «Kıiz úıde», «Sherqala», «Keli túıgen qazaq áıeli», «Qazaq qyzy Katıa» jáne taǵy da basqa sýret týyndylaryn qaldyrǵan. Onyń shyǵarmalary Á.Tájibaev, T.Jarokov, Q.Bekhojın, S.Muqanov, S.Máýlenov syndy qazaq jazýshylarynyń tárjimalaýymen birneshe márte kitap bolyp jaryq kórgen.
Sharany Qazaqstandaǵy Ýkraına elshiligi uıymdastyrdy.
