Astanada Úkimet basshysynyń qatysýymen «Qaraótkel-2012» jármeńkesi ashyldy
Sharanyń ashylý saltanatyna Premer-Mınıstr Kárim Másimov, Aýyl sharýashylyǵy mınıstri Asyljan Mamytbekov, Astana ákimi Imanǵalı Tasmaǵambetov, «QazAgro» ulttyq holdınginiń basshylary men aımaq jetekshileri qatysty.
«Halqynyń jartysyna jýyǵy aýylda turatyn Qazaqstan úshin agroónerkásiptik keshen ekonomıkanyń eń mańyzdy salasy bolyp tabylady. Elbasymyz Nursultan Nazarbaevtyń tikeleı qamqorlyǵy arqasynda Qazaqstan aýyl sharýashylyǵy damyǵan álemdik derjavalardyń qataryna qosyldy. Oǵan búgingi jármeńkedegi ónimder kýá. Jármeńke mamandardyń ózara qarym-qatynasyna, aımaqaralyq baılanystardyń nyǵaıýyna, taýar aınalymynyń ósýine zor yqpal etedi», - dedi K. Másimov.
«Qaraótkel-2012» Qazaqstannyń AÓK jetistikteriniń jármeńkesi «Metro» saýda ortalyǵynyń aýmaǵynda 6-shy márte meımandardy toǵystyryp otyr. Jármeńke-kórmeniń taqyryby aýylsharýashylyq ónerkásibiniń barlyq quramdas bóligin qamtıdy. Sońǵy jyldardyń jańashyldyqtary ári naryqty baǵyndyrǵan ónimderdi jármeńke-kórmege qatysatyn kompanııalar ekspozıtsııalar men tusaýkeserlerde usynady. Oǵan 300-ge tarta kásiporyn qatysýda.
Sharaǵa barlyq oblystar atsalysýda. Olar úzdik aýylsharýashylyq jáne qaıta óńdeıtin kásiporyndarynyń ónimderin qoıyp otyr.
Ekspozııanyń maqsaty óńirlerde júzege asyrylǵan aýyl sharýashylyǵyn damytý baǵdarlamasynyń nátıjesin keshendi túrde pash etý. Elimizdiń ár oblysynyń qarjylyq, ekonomıkalyq, ulttyq jáne aýmaqtyq erekshelikteri nazarǵa usynylmaq.
Uıymdastyrýshylar meımandar úshin mamandyrylǵan semınarlar men tusaýkeserler ótkizýdi josparlap otyr.
