Astanada ÚIID baǵdarlamasy aıasyndaǵy jobalarǵa bólingen qarajattan memleketke 8,2 mlrd. teńge zalal keltirilgen
ASTANA. 29 qazan. QazAqparat - Aǵymdaǵy jyldyń 9 aıynda Astana qalasy boıynsha Qarjy polıtsııasy departamenti ulttyq kompanııalar men damý ınstıtýttarynyń Údemeli ındýstrıaldy-ınnovatsııalyq damý Memlekettik baǵdarlamasynyń jáne ınvestıtsııalyq jobalardyń zańdylyǵyn buzý derekteri boıynsha 76 qylmystyq is qozǵady. Memleketke keltirigen zııannyń jalpy somasy 8,2 mlrd. teńgeni qurady. Bul týraly búgin departamentte ótken baspasóz máslıhatynda Damý ınstıtýttary men ulttyq kompanııalardaǵy qylmystardy ashý basqarmasynyń basshysy Beıbit Moldabekov málimdedi.
Onyń aıtýynsha, osy sanattaǵy 68 qylmystyq is sotqa joldandy.
«ÚIID MB-ǵa engizilgen «Syıymdylyǵy 8000 tonna kókónis qoımasyn salý» ınnovatsııalyq jobasyn iske asyrýǵa bólingen 10 mln. teńgeniń urlaný deregi boıynsha jeke kásipkerge qatysty qylmystyq is qozǵalyp, sotqa joldandy», - dedi B. Moldabekov.
Sondaı-aq, onyń málimetinshe, Astana qalasynda «Syıymdylyǵy 5000 tonna kókónis qoımasyn jáne jemis-kókónis ónimin qaıta óńdeıtin tseh salý» kezinde 25 mln. teńgeden astam bıýdjet qarjysynyń urlaný deregi boıynsha qylmystyq is tergelý ústinde.
