Astanada ÚEU-lardyń jumysyna arnalǵan fotosýretter men jumystyq materıaldardyń kórmesi ashyldy

ASTANA. 23 qarasha. QazAqparat /Gúlmıra Álıakparova/ - Búgin Astanadaǵy Beıbitshilik jáne kelisim saraıynda EQYU Sammıti qarsańynda otandyq úkimettik emes sektor jumysyna arnalǵan «Azamattyq qoǵam: árkimniń úlesi» taqyrybynda fotosýretter men atqarylǵan jumystar týraly materıaldardyń kórmesi ashyldy.

Kórmeni Qazaqstannyń Azamattyq alıansy uıymdastyrdy. Oǵan ÚEU-lar júzege asyrǵan áleýmettik mańyzy bar jobalar týraly aqparattar men qoǵamnyń damýyna úles qosyp júrgen qarapaıym qazaqstandyqtardyń fotosýretteri qoıyldy. Kórme 27 qarashaǵa deıin jumys jasaıdy.

«Barshamyzǵa belgili, ÚEU-lar adamdarmen jáne adamdar úshin jumys jasaıdy. Adamdar ómiriniń sapasyn arttyrýǵa baǵyttalǵan jobalar kún saıyn júzege asyrylyp keledi. Olarmen birge el halqynyń taǵdyryna beı-jaı qaramaıtyn, kez kelgen ýaqytta kómekke daıar qarapaıym azamattar da bul salaǵa eńbekterin kóptep sińirýde», - deıdi Azamattyq alıanstyń Úkimettik emes uıymdardy damytý baǵdarlamasynyń dırektory Andreı Emelın.