Astanada ÚEU-lar arasynda áleýmettik ıdeıalar men jobalardyń respýblıkalyq jármeńkesi ótti
dep habarlaıdy QazAqparat.
Jármeńke QR Mádenıet jáne aqparat mınıstrligi men «Astana-Úkimettik emes uıymdardy qoldaý ortalyǵynyń» uıytqy bolýymen QR Úkimetiniń janyndaǵy Úkimettik emes uıymdarmen ózara is-qımyl jónindegi úılestirý keńesiniń VІІІ-shi otyrysy sheńberinde uıymdastyryldy.
«Astana-Úkimettik emes uıymdardy qoldaý ortalyǵynyń» tóraıymy Altynaı Kóbeevanyń aıtýynsha, ÚEU-lar arasynda áleýmettik ıdeıalar men jobalar boıynsha baıqaý ústimizdegi jylǵy tamyz aıynda jarııalandy jáne osy ýaqytqa deıin 100-den astam uıymnan túrli taqyryptar boıynsha 80-ge jýyq joba usynylǵan. Salalyq mınıstrlikter men halyqaralyq uıymdardyń sarapshylarynan quralǵan qazylar alqasy, ómirge engizilýi tıis dep sheshilgen 23 jobany tańdap aldy.
«Usynylǵan jobalardyń deni qoǵamda az qorǵalǵan jandardyń quqyqtaryn qorǵaý men ekologııalyq máselelerge arnalǵan. Baıqaýdyń barlyq 23 jeńimpaz-laýreaty 2010 jyly QR Mádenıet jáne aqparat mınıstrliginiń memlekettik áleýmettik tapsyrysyna usynylatyn bolady», dedi ol.
Jármeńkeni aralap kórgen Mádenıet jáne aqparat mınıstri Muhtar Qul-Muhammed, asa sırek kezdesetin gúlderdiń túrlerin el aýmaǵyna ákelip, jersindirip jatqan «Gúlzar» qoǵamdyq birlestiginiń usynyp otyrǵan jobasyn erekshe dep atap ótti. «Bul biregeı joba. Sebebi, qoǵamdyq birlestik Qazaqstanda 1 myńnan astam gúl túrin aýdandastyrýmen aınalysady. Olardyń isi asqan eńbekqorlyqty qajet etedi. Bul QR Prezıdenti N.Nazarbaevtyń elimizdi kógaldandyrý boıynsha qoıǵan tapsyrmalaryna tolyǵymen sáıkes», dedi ol.
