Astanada ýchaskelik polıtsııa pýnktteriniń sany artady
ASTANA. QazAqparat – Elordada aldaǵy úsh jyldyń ishinde ýchaskelik polıtsııa pýnktteriniń sany eselep artady. Bul týraly Astana qalalyq polıtsııa departamentiniń bastyǵy Marat Tólebaev aıtty, dep habarlaıdy QazAqparat tilshisi.
«Polıtsııanyń qadamdyq jerdegi qoljetimdiligi qaǵıdaty engizilip jatyr. Ótken jyly qalada modýldik úlgidegi 10 statsıonarlyq beket ornatyldy. Ýchaskelik polıtsııa pýnktteriniń sany 27-den 42-ge deıin ulǵaıtyldy. Aldaǵy úsh jylda olardy eki esege arttyrýdy josparlap otyrmyz», - dedi ol elorda máslıhatynyń otyrysynda.
Sondaı-aq, onyń aıtýynsha, adamdar kóp jınalatyn jerlerde polıtsııany shuǵyl shaqyrý dabylyn berý úshin 13 SOS túımesi ornatylǵan. Barlyǵy 24 myńǵa jýyq sıgnal kelip tústi, olar boıynsha tıisti is-shara qabyldandy.
«Almaty aýdanynyń aýmaǵynda «polıtsııanyń qazaqstandyq servıstik modeli« pılottyq jobasy qolǵa alyndy. Onyń strategııasy azamattarǵa sapaly polıtsııa qyzmetterin kórsetý jáne qaýipsizdik máselelerin sheshý qaǵıdattaryna negizdelgen. Joba iske asyryla bastaǵannan beri ýchaskelik polıtseılerdiń tanymaldyq deńgeıi úsh esege artty. Olardyń jumysynyń aqparattyq qamtylýy ósti. Ýchaskelik polıtseılerdiń kúndelikti jumys protsesteri utymdy bola tústi. Endi olardyń halyqpen jumys isteýge kóbirek ýaqyty bar. Bıyl Saryarqa aýdany boıynsha taǵy bir pılottyq jobany iske qostyq. Jumys júrgizilip jatyr», - dedi Marat Tólebaev.
