Astanada UBT ótkiziletin oryndar anyqtaldy
ASTANA. QazAqparat - 2 maýsymda elordada túlekterdiń basym bóligi Ulttyq biryńǵaı testileý tapsyrady. Astana qalasynda UBT 2, 4, 6 maýsym kúnderi ótedi, al apellıatsııalyq shaǵym túsirgisi keletinder mamandar kómegine 3, 5, 7 maýsym kúnderi júgine alady. Bul týraly Bilim basqarmasynan habarlady, dep jazady elorda ákimdiginiń resmı saıtynda.
UBT tańǵy saǵat 9.00-de bastalady. Ulttyq biryńǵaı test tapsyrýǵa bólinetin ýaqyt - 3,5 saǵat. Nátıjeleri tapsyrylǵan kúni keshki saǵat 18.00-den keıin belgili bolady. Eske salaıyq, test tapsyrýdyń formaty ózgergen joq, JOO-ǵa túsý úshin eń tómengi kórsetkish - 50 ball, ulttyq joǵarǵy oqý oryndary úshin 70 balldy qurap otyr. Astanada UBT ótetin úsh oryn anyqtaldy. Olar - L.N.Gýmılev atyndaǵy Eýrazııa ulttyq ýnıversıteti (1750 oqýshy), QazMZÝ (781 oqýshy) jáne S.Seıfýllın atyndaǵy QazATÝ (1 057 oqýshy). Aıta keteıik, bıyl Astanada 4 042 oqýshy mektep bitiredi. Sonyń ishinde 88,7 paıyzy, ıaǵnı 3588 túlek Ulttyq biryńǵaı testileýge qatysyp, óz bilimderiniń sapasyn synaıdy. Olardyń 1777-si - qazaq tilinde, 1811-i orys tilinde test tapsyrmaq. Al qalǵan 454 oqýshy (11,2%) - alys jáne jaqyn shetelderdiń oqý oryndaryna túsetinder memlekettik emtıhan tapsyrady. Sondaı-aq halyqaralyq olımpıadalar men ǵylymı jobalar baıqaýlaryna qatysqandar Ulttyq biryńǵaı testileýden bosatylady. Olardyń sany QR BǴM buıryǵy shyqqan soń belgili bolady, ázirge olar UBT tapsyratyn oqýshylar bazasyna enip otyr.
