Astanada UBT-nyń ortasha baly - 81,3
ASTANA. 10 maýsym. QazAqparat - Elordada Ulttyq biryńǵaı testileýdiń qorytyndysy shyǵaryldy. Qalada UBT boıynsha ortasha ball kórsetkishi - 81,3. Jalpy eseptik kórsetkish boıynsha Astana Almaty qalasynan keıingi ekinshi orynda tur. Bul týraly astana.kz saıtyna Astana qalasynyń Bilim basqarmasynan málimdedi.
«Barlyǵy 3073 túlek táýelsiz syrtqy baqylaýdan ótken bolsa, test synaǵyna 84,5 paıyz túlek qatysty. Al ortasha ball - 81,3 ball», - dedi vedomstvodan.
UBT synaǵynan joǵarǵy deńgeıdegi kórsetkishke ıe bolǵan mektepterdiń tizimi tómendegideı. Eń joǵary ortasha ball: «Zerde» №9 daryndy balalarǵa arnalǵan mektep - 116,09, daryndy qyz balalarǵa arnalǵan QTL -110, «Nur Orda» QTL 106,07, daryndy er balalarǵa arnalǵan QTL 103, 13, №50 mektep-lıtseı 102, 53, sondaı-aq, №38 mektep lıtseıi 102,10 ortasha ball jınap, úzdikterdiń qatarynan kórindi.
UBT qorytyndysyna sáıkes №46 mektep-gımnazııasynyń túlegi Aleksandra Shalagaeva men №54 mektep-lıtseıdiń túlegi Laýra Jaýhanova eń joǵary 123 ball jınaǵan. Sonymen qatar, 629 qatysýshy 100-den 123-ke deıin ball jınaǵan.
Atalǵan basqarmanyń málimetine súıensek, 66 mektep bitirýshi «Altyn belgi» úzdik attestatyn sátti qorǵap shyqqan. Jalpy bilim beretin pánder boıynsha 564 túlek qorytyndy emtıhan tapsyrsa, olardyń 218-i - halyqaralyq ǵylymı jobalar men olımpıadalardyń jeńimpazdary. Qalǵan mektep bitirýshiler shetelde nemese kolledjderden bilim alady. UBT-ǵa qatyspaǵan 3 mektep bitirýshi keshendi testileýge qatysatyn bolady. Al 17 oqýshy syrqatyna baılanysty qorytyndy attestattaýdan bosatylǵan.
