Astanada tyıym salynǵan jerlerde temeki shekken 7000 azamat jaýapqa tartyldy
ASTANA. QazAqparat - Astana qalasynyń ІІD baspasóz qyzmetiniń habarlaýynsha, jyl basynan beri 4 myńnan astam usaq buzýshylyq tirkeldi, sonyń ishinde jalpy ortaq paıdalanylatyn oryndardy lastaý, kommýnaldyq qaldyqtardy tastaý jaǵdaılary bar. Nátıjesinde 3704 ákimshilik aıyppul salyndy, 542 tártip buzýshy ákimshilik qamaýǵa alyndy, dep habarlady astana.gov.kz.
Tyıym salynǵan jerlerde temeki shekken 7000 azamat jaýapqa tartyldy. Qalany abattandyrý erejelerin buzǵan uıymdar da nazardan tys qalmaıdy. 150-den astam PIK basshysy ákimshilik jaýapkershilikke tartyldy. Sondaı-aq, buzýshylyqtardyń aldyn alý maqsatynda kóshpeli sot otyrystaryn, sonyń ishinde joǵary oqý oryndarynda jáne uıymdarda ótkizý praktıkaǵa engizildi. Jyl basynan beri 32 kóshpeli sot otyrysy boldy. Jol qozǵalysy qaýipsizdigin qamtamasyz etý jáne jazanyń qoldanylmaı qalmaý prıntsıpin júzege asyrý maqsatynda elorda ákimdiginiń qoldaýymen «Astana qalasynyń tirshilikti keshendi qamtamasyz etý júıesi» (TKQJ) aıasynda respýblıkamyzda alǵash ret jol qozǵalysy qaýipsizdigin baqylaý salasynda jańa tehnologııalar qoldanylýda. Atap aıtqanda, júıe jyldamdyq rejımin buzý, baǵdarshamnyń tyıym salynǵan belgisine júrý jáne belgiden asyp toqtaý sııaqty birneshe JQE buzý jaǵdaılaryn bir ýaqytta tirkeýge múmkindik beredi. Búginde júıe qalanyń kólik aǵyny qatty 10 negizgi magıstraldyq qıylysyna ornatylǵan. Foto-beınetirkeý júıeleri arqyly bir aptada 500-den astam buzýshylyq tirkeldi. Aıyppuldardyń jalpy somasy 7 mln. teńgeden asady.
