Astanada tynys alý júıesi aýrýlaryna qatysty halyqaralyq ǵylymı-tájirıbelik konferentsııa ótti
ASTANA. Mamyrdyń 6-sy. QazAqparat /Aıgúl Aıtmuqanova/ - QR Densaýlyq saqtaý mınıstrligi, UǴMO (Ulttyq ǵylymı medıtsınalyq ortalyqtyń) men Eýroazııalyq respıratorlyq qoǵamnyń uıymdastyrýymen Astanada «Antıbıotıkke turaqtylyqtyń máseleleri.
Sozylmaly obstrýktıvti ókpe aýrýlary jáne bronhıaldy astmanyń jańa, qazirgi tańdaǵy em joldary» atty halyqaralyq ǵylymı-tájirıbelik konferentsııa ótti, dep habarlaıdy QazAqparat.
Atalmysh sharaǵa Reseı respıratorlyq qoǵamynyń akademıgi A.Chýchalın (Máskeý), Reseı pýlmanologııa ǵylymı-zertteý ınstıtýty dırektorynyń orynbasary S.Avdeev (Máskeý), professorlar I.Andreev (Smolensk), V.Arhıpov (Máskeý), Qyrǵyz respıratorlyq qoǵamynyń tóraǵasy T.Sooranbaev (Bishkek) jáne otandyq pýlmanolog-mamandar qatysty.
Búgingi tańda tynys alý júıesi aýrýlarynyń keń taralýyna baılanysty dúnıe júziniń respıratorlyq medıtsına mamandary dabyl qaǵýda. Qazaqstanda bul kórsetkish 35 paıyzdy qurap, basqa aýrýlardyń ishinde 1 orynǵa shyǵyp otyr.
QR Densaýlyq saqtaý vıtse-mınıstri Salıdat Qaıyrbekovanyń sózine qaraǵanda, bıyl mınıstrlik UǴMO tynys alý júıesi aýrýlaryn aldyn alý, anyqtaý men emdeýge qatysty eki ǵylymı jobany qarjylandyryp otyr.
Buǵan deıin 2006 jyldyń 29 qarashasynda tynys alý júıesi aýrýlary máselesin sheshý maqsatynda Eýroazııalyq respıratorlyq qoǵam qurylǵany belgili. Oǵan Reseı, Qazaqstan, Qyrǵyzstan, Ózbekstan, Tájikstan, Moldova, Belarýs, Ázirbaıjan memleketteri múshe. Qoǵamnyń shtab-páteri Astanada ornalasqan.
