Astanada tutynýshylardan túsken shaǵymdar 55 paıyzǵa kóbeıdi
ASTANA. KAZINFORM — Astana qalasy boıynsha Saýda jáne tutynýshylardyń quqyqtaryn qorǵaý departamentine bıylǵy jyldyń alǵashqy jartyjyldyǵynda 6 221 ótinish tústi. Bul ótken jyldyń osy kezeńimen salystyrǵanda 55 paıyzǵa kóp. Bul týraly departament basshysy Erkebulan Taǵashov aıtty.
— Jyl basynan beri departamentke 6 221 ótinish kelip tústi. Byltyr osy kezeńde 4 017 ótinish bolǵan. Demek, bıyl kórsetkish 55 paıyzǵa joǵary. Ótinishterdiń kóbeıýi azamattardyń quqyqtyq saýaty artyp, óz quqyǵyn qorǵaýǵa belsendi kiriskenin kórsetedi, — dedi Erkebulan Taǵashov.
Onyń aıtýynsha, alty aıda eń kóp shaǵym bólshek saýdaǵa qatysty — 1 344, al elektrondyq saýdaǵa qatysty — 1 224 ótinish tirkelgen.
— Sonymen birge bilim berý qyzmetteri boıynsha 608, turmystyq qyzmetter boıynsha 536, medıtsınalyq qyzmetter boıynsha 525, baılanys qyzmetteri boıynsha 383 ótinish tústi, — dedi departament basshysy.
Qoǵamdyq tamaqtandyrý, qarjy, kólik jáne turǵyn úı-kommýnaldyq sharýashylyǵy salalary boıynsha 614, al rıeltorlyq, qurylys, jóndeý jáne ózge qyzmet túrleri boıynsha 987 shaǵym qaraldy.
— Qashyqtan jáne ınternet arqyly saýdaǵa qatysty shaǵymdar kóbeıip keledi. Departament azamattardyń ótinishterin qarap, buzylǵan quqyqtaryn qalpyna keltirý jáne zań buzǵan kásipkerlerge shara qoldaný jumysyn jalǵastyryp jatyr, — dep tolyqtyrdy Erkebulan Taǵashov.
Aıta keteıik, buǵan deıin departamenttiń yqpalymen tutynýshylarǵa 400 mıllıon teńgeden astam qarajat qaıtarylǵany týraly habarlaǵan edik.
