Astanada Tursyn Jurtbaıdyń 60 jasqa tolýyna arnalǵan kesh ótedi
ASTANA. 3 qarasha. QazAqparat - 4 qarasha kúni L.N.Gýmılev atyndaǵy Eýrazııa ulttyq ýnıversıtetinde jazýshy, ǵalym, «Otyrar kitaphanasy» ǵylymı ortalyǵynyń dırektory Tursyn Jurtbaıdyń 60 jasqa tolýyna arnalǵan kesh ótedi.
60-tyń belesine shyqqan fılologııa ǵylymdarynyń doktory, professor, pýblıtsıst, ustaz, qoǵam qaıratkeri Tursyn Qudakeldiulynyń mereıtoılyq keshine Júrsin Erman, Janbolat Aýpbaev, Nesipbek Aıtuly, Namazaly Omashuly, Sáýlebek Jámkenov, qatarly kýrstastary, oqyrmandary qatysady.
Kesh barysynda T.Jurtbaıdyń shyǵarmashylyǵynan baıandama jasalyp, óleńderi oqylady. Sondaı-aq, halyq ánderi men A. Baıtursynuly, J. Aımaýytuly syndy alash arystarynyń ánderi oryndalady.
Jurtbaı Tursyn Qudakeldiuly 1951 jyly Semeı oblysy Abaı aýdany Shaǵan aýylynda týǵan. 1974 -1990 jyldary «Jetisý» gazetinde, «Bilim jáne eńbek», «Juldyz» jýrnaldarynda qyzmet istedi. 1990 -1998 jyldary M.Áýezov murajaıynda ǵylymı qyzmetker, bólim bastyǵy, dırektor. 1998 - 2001 jyldary doktorant, QazUÝ-da oqytýshy. 2001 jyldan «Otyrar kitaphanasy» ǵylymı-zertteý ortalyǵynyń dırektory.
«Júregimde jumyr jer» óleńder men poemalar, «Besqarager», «Dara tulǵa», «Jer - besik» roman-novellasy, «Beıýaq» roman-essesi, «Besigińdi túze», «Talqy» roman-esseleri, «Mýhtar Omarhanovıch Aýezov», «Kúıesiń júrek... súıesiń!», «Besigińdi aıala!...» kitaptary jaryq kórdi.
T.Jurtbaı Alash qaıratkerleriniń shyǵarmalary men ómir derekteri týraly kóptegen izdenister júrgizip, solardyń negizinde ǵylymı eńbekter jazdy. Ol «Alash aqıyqtary» jınaǵyn qurastyryp, Alash qaıratkerleriniń beımálim shyǵarmalaryn jalpy jurtshylyqqa tanystyrdy. Halyqaralyq «Alash», І.Jansúgirov atyndaǵy ádebı syılyqtardyń laýreaty.
