Astanada turmysy tómen azamattarǵa Qurban aıtta et taratylady

ASTANA. 14 qazan. QazAqparat - Bıyl Astana qalasynyń meshitteri men QMDB janyndaǵy «Zeket» qory «Qurban shal» aktsııasyn ótkizedi. Aktsııa aıasynda qurbandyqqa shalynǵan maldardyń eti Astana qalasynda jáne Aqmola oblysynda turyp jatqan turmysy tómen azamattarǵa taratylady. Bul týraly astana.kz saıtyna Din isteri basqarmasynan habarlady.

«Qurban aıt kezinde et beriletin adamdardyń tizimi jasaldy. Oǵan elordanyń úsh aýdanynyń árqaısysynan 200-ge jýyq adam engen. Tizim qalalyq meshitterge joldandy. Olar adamdarǵa telefon shalyp, shaqyrady. Arnaıy avtobýstar adamdardy mal soıatyn jerge aparyp, ákeledi. Ár adamǵa 5-6 keli et beriledi», - dep habarlady astana.kz saıtyna vedomstvodan.

Aıta keteıik, bıyl Qurban aıt merekesi 15-17 qazanda atap ótiledi. Sanıtarlyq talaptardy saqtaý maqsatynda Astana qalasynyń ákimdigi mal satyp alatyn jáne qurbandyq shalynatyn arnaıy oryndardy belgiledi. Maldy tek Astana - Qosshy tas jolynyń boıyndaǵy «Altyn taǵa» bazarynda ǵana satyp alyp, qurbandyqqa shalýǵa ruqsat etilgen.